सिरहामा एक युवकको मृत्यूपछि कोरोना पुष्टि

न्यूज ब्यूरो, सिरहा । प्रदेश नम्बर २ को सिरहा जिल्लास्थित एक युवकको मृत्यू भएपछि कोरोना पुष्टि भएको जनाइएको छ ।

सिरहाको गोलबजार नगरपालिका वडा नम्बर ६ बस्ने एक ३४ वर्षीय युवकको मृत्युपछि कोरोना संक्रमण पुष्टि भएको प्रदेश स्वास्थ्य निर्देशनालयले जनाएको छ ।

गोल बजार स्थित रहेको भूमिजा अस्पतालमा उपचार गराइरहेका युवकको अवस्था जटिल भएपछि वैशाख ६ गते बीपी कोइराला स्वास्थ्य विज्ञान प्रतिष्ठान धरान रेफर गरिएको थियो ।

धरान जाने क्रममा बाटोमै मृत्यु भएका युवकको धरानमै स्वाब लिएर परीक्षण गर्दा वैशाख ७ गते पोजेटिभ रिपोर्ट आएको स्वास्थ्य निर्देशनालयका वरिष्ठ चिकित्सक कमलेश यादवले जानकारी दिए ।

योसँगै कोरोना संक्रमण पुष्टि भएर सिरहामा मृत्यु हुनेको संख्या २६ पुगेको छ । कोरोना समुदाय स्तरमा पुगेपनि सिरहाका बोर्डिँग स्कूल र नीजि कलेजहरु भने अझै बन्द गरिएको छैनन् ।