मेयर र वडाध्यक्षहरुको लडाईमा पिसिल्दै नगरवासी, अझै खुलेन अफिसको ताला

न्यूज ब्यूरो, जनकपुरधाम । पूर्वी धनुषाको कमला नगरपालिकाको मेयर र केही वडाध्यक्षहरुको मतभेदका कारण सिँगो नगरपालिकावासी नै मार्कामा परेका छन् ।

कमला नगरपालिकाका मेयर राम उदगार गोईत र केही वडाध्यक्षहरुको आपसी असहमति तथा विवादको कारण एक सातादेखि नगरपालिकामा तालाबन्दी गरिएको छ भने ताला अझै खुल्न नसक्दा नगरवासी मार्कामा परेका छन् ।

नगरपालिकाका मेयर राम उदगार गोईतले नगरसभा हुनुअघि गरिएको सम्झौता बमोजिम कार्य नगरी तथा वडास्तरीय बजेटको योजना समेत कटौती गरेको भन्दै विगत एक सातादेखि नियमित तालाबन्दीको शिकार नगरपालिकावासी भएका छन् ।

वडा नम्बर १ का वडाध्यक्ष राजकुमार यादव, वडा नं. २ का वडाध्यक्ष धनेश्वर यादव, वडा नं. ३ का वडाध्यक्ष विशेश्वर यादव र वडा नं. ८ का वडाध्यक्ष राजेश्वर मरिक यादवले सँयुक्त रुपमा वडास्तरीय बजेटमा कटौती गरेको भन्दै तालाबन्दी गरेको जनाएका छन् ।

विगतमा गरेको सम्झौता थता ज्ञापन पत्रको सन्दर्भमा नगर प्रमुख गोईतले जसपाका नगर सभापति कहाँ जवाफ पठाएको बताउँदै वडाध्यक्षहरुले राजनीतिक दृष्टिकोणले उक्साहटमा परेको बताए ।

उनले ज्ञापन पत्रको जवाफ र उनीहरुले गरेको जायज मागहरु सम्बोधन भएको तथा केही प्रक्रियागत रुपमा हुने क्रममै रहँदा नगरपालिकामा तालाबन्दी गरिएपछि झन रोकिएको प्रतिक्रिया दिए ।

मेयर गोईतले तालाबन्दीको विकल्प खोजेर आम नागरिकलाई सास्ती नहुने गरी असन्तुष्ट वडाध्यक्षहरुसँग समन्वय तथा सम्झौता गर्न आफू तयार रहेको बताए । उनले वडाको बजेट कटौती सन्दर्भमा अनुमानित गरिएको बजेटमा केही तलमाथि हुनु स्वभाविक रहेको बताए ।

यता, वडा नम्बर २ का वडाध्यक्ष धनेश्वर यादवले भने वितगमा बारम्बार मेयर गोईतले सम्झौता गरेर पनि मागहरु पुरा नगरेको भन्दै बाध्य भएर तालाबन्दी गर्नुपरेको बताए । उनले तालाबन्दीको विकल्प आफूहरु पनि खोजिरहेको बताउँदै नगर प्रमुखको हैसियतले विगतका सम्झौताहरु कार्यन्वयन नगरे तालाबन्दी जारी राख्ने चेतावनी पनि दिएका छन् ।

वृद्धवृद्धाहरुको वृद्धाभत्ता, दलित बालबालिकाहरुको पोषण भत्ताहरु समेत गत आर्थिक वर्षदेखि नै उपलब्ध नगराएको भन्दै बाध्य भएर तालाबन्दी गरेको वडाध्यक्ष यादवले बताए ।

सोही क्रममा वडा नम्बर १ का वडाध्यक्ष राजकुमार यादवले भने विगतमा गरेका सम्झौताहरु जबसम्म कार्यन्वयन हुँदैन तबसम्म तालाबन्दी जारी राख्ने चेतावनी पनि दिए । करिब ५ महिनाअघि गरेको विभिन्न सम्झौता कार्यन्वयन जति दबाब र आग्रह गरेपनि सम्बोधन नगरेपछि अन्त्यमा तालाबन्दी गर्नुपरेको बताए ।

सो सन्दर्भमा धनुषाका प्रमुख जिल्ला अधिकारी (सिडिओ) बन्धु प्रसाद वास्तोलाले आफू प्रहरी लगाएर एक पटक ताला काटन लगाएपनि पुनः तालाबन्दी गरिएको बताए । उनले नगरपालिकाका मेयरलाई सहमतिको बाटोमा गएर तत्काल तालाबन्दी खुलाउन निर्देशन दिएको बताए ।

सिडिओ वास्तोलाले यस्तो महामारीको बेला पनि जनप्रतिनीधिहरुको आपसी किचलोका कारण सरकारी कार्यालय बन्द हुनु दुःखद रहेको बताउँदै आईतबार (भोली) सम्म सहमति गरी तालाबन्दी खुलाउने प्रयास गरिने बताए ।

यस सन्दर्भमा एक पटक यसअघि नै असन्तुष्ट वडाध्यक्ष र मेयरबीच बैठक बसेपनि बैठक विफल भएको बताइएको छ । तालाबन्दीका कारण नगरपालिकाको सबै काम कार्य ठप्प भएको छ ।