जनकपुरका दिवाकर उप्रेती रेस्टलेस् डेभलपमेन्ट इन्टरनेशनलको बोर्ड अफ् डिरेक्टरसमा

न्यूज ब्यूरो, जनकपुरधाम । जनकपुरधामका सक्रिय युवा अभियान्ता तथा युथ एड्भोकेसि नेपालका अभियान संयोजक साथै न्यूज ब्यूरोकर्मी दिवाकर उप्रेती रेस्टलेस् डेभलपमेन्ट इन्टरनेशनलको अन्तर्राष्ट्रिय योङ्ग ट्रस्टि सदस्य र निर्देशकमा नियुक्त भएका छन् ।

जनकपुरधाममा धनुषा स्काउटमा स्काउटर हुदै, एकिकृत बाल क्लब देखि बालबालिकाका सवाल र आवाजलाई नेतृत्व दिएका तथा कार्यव्यन गर्न अभियान चलाएका उप्रेतीले करिब ७ बर्ष देखि निरन्तर सक्रियताका साथ अभियान संचालन गर्दै आएका छन् ।

आफु युवा अवस्थामा पुग्ना साथ बाल क्लबबाट राजिनामा दिई संस्थालाई पुस्तान्तरण गर्ने जस्तो जिम्मेवार भुमिका निर्वाह गरेका थिए । उप्रेति आफ्नो पढाईको सिलसिलामा काठमाण्डौ पुगे पस्चात् युथ एड्भोकेसि नेपाल जस्तो युवा संस्थामा आफुलाई सक्रिय ढङ्गले कार्य सम्पादन गर्दै आएका थिए भने न्यूज ब्यूरोका लागि समाज रुपान्तरण गर्ने हेतुले थुप्रै आलेखहरुमा निरन्तर कलम चलाउदै आएका छन् । युवालाई थप शसक्त बनाउन तथा अवसरसंग जोड्न युवा सवाल तथा कार्यक्रम गर्दै आएका छन् ।

“अन्तराष्ट्रिय स्तरमा आफुलाई मात्र चिनाएको होइन कि नेपालकै पहिलो पटक प्रतिनिधित्व समेत गरेको छु । मलाई विश्वास छ यो अवसरलाई सुनिश्चित गर्दै अझ युवा आन्दोलनलाई सशक्त तथा कार्यव्यनको लक्ष्य तर्फ उन्मुख गर्ने र गराउनेमा महत्वपूर्ण भुमिका निर्वाह गर्ने छु ।”– उनले भने ।

दिवाकरले हाँसिल गरेको यो स्थान आफैंमा महत्वपूर्ण छ । रेस्टलेस इन्टरनेशनलले युवाहरु संगै काम गर्ने गर्दछ भने युवालाई नै नेतृत्व दिने र अब्बल बनाउने गर्दछ । जसमा विश्वका चुनिएका युवाहरुको ४ वर्ष कार्यकाल हुने गर्दछ । जसमा उप्रेति अन्तर्राष्ट्रिय निर्देशक र ट्रस्टि सदस्यमा नियुक्त भएका हुन् ।

उप्रेतीको यो उपलब्धिले जनकपुरधाम सहित नेपालको प्रतिनिधित्व भएको छ । साथै उप्रेती युवाहरुको लागि प्रेरणाको श्रोत समेत बनेका छन् ।