पत्रकार महासँघ धनुषामा नेतादेखि बिचौलियासम्म सदस्य (नामसूचि सहित)

न्यूज ब्यूरो, जनकपुरधाम । नेपाल पत्रकार महासँघ धनुषा शाखामा परिवारवाद हावी भएको स्पष्ट देखिएको छ ।

धनुषा वा अन्य ठाउँमा सक्रिय भएर पत्रकारिता क्षेत्रमा काम गर्दै आएका विशुद्ध पत्रकारहरुलाईलाई बायकट गरी परिवारका सदस्यहरुलाई समेत पत्रकार महासँघको सदस्य बनाएको देखिएको छ ।

आगामी चैत्त २५ गते नेपाल पत्रकार महासँघको हुने निर्वाचनको लागि धनुषा शाखाको १ सय ७४ जनाको सदस्यता देखाएको छ । पुरानो र नयाँ गरी १ सय ७४ जना सदस्यको नामावली सावर्जनिक केन्द्रीय कार्यालयले गरेको हो ।

जसमा नेतादेखि लिएर बिचौलियासम्मको नाम रहेको छ । धनुषामा सक्रिय भएर काम गर्दै आएका विनय कुमार यादव, ओम प्रकाश साह, कमलेश ठाकुर, राजा झा, सुमित मिश्र, रोहित महतो लगायतका सँचारकर्मीहरुलाई सदसयातबाट बञ्चित गरिएको छ ।

सोही ठाउँमा पुराना केही सदस्यहरुले आ–आफ्ना परिवारका सदस्यहरुलाई पनि पत्रकार महासँघको सदस्यता वितरण गरेको छ । विशुद्ध रुपमा पत्रकारिता गर्नेहरुलाई बायकट गरी परिवारवाद लादिएको देखिएको छ ।

निर्वाचनमा भोट असुल्ने प्रवृतिलाई यथावत राख्दै कहिले पत्रकारिता नै नगरेका व्यक्तिहरुलाई पनि नेपाल पत्रकार महासँघको सदस्यता कोशेली झैं वितरण गरिएको देखिएको छ ।

जसमा पत्रकार महासँघ वर्तमान समितिका उपाध्यक्ष धमेन्द्र झाका भाई जीवनारायणलाई समेत सदस्यता दिएको छ । जानकारी अनुसार, जीवनारायण झा यातायात कार्यालय जनकपुरमा विचौलियाको काम गर्दै आएको छ ।

यस्तै, सँतोष कुमार यादव जो की सिटिजन्स बैँकमा कार्यरत छन् । सँतोष कुमार यादव पत्रकार एवम् वर्तमान प्रदेश नम्बर २ का विद्यायक राम अशिष यादवका भाई हुन् ।

पत्रकार महासँघको सदस्यता कोटामा बाँडफाँड हुँदा सरकारी कार्यालयमा कार्यरत करारका कर्मचारीहरुलाई समेत सदस्यतामा राख्ने निर्णय गरिएको बुझिएको छ ।

सो अनुसार, लक्ष्मण यादव र आतिश मिश्रलाई समेत सदस्यता नविकरण गरिएको छ । लक्ष्मण यादव प्रदेश नम्बर २ को मुख्यमन्त्री कार्यालयमा कार्यरत छन् भने आतिश मिश्र पनि मुख्यमन्त्रीको प्रेस सँयोजकको रुपमा कार्यरत छन् ।

सोही क्रममा सदस्यता नविकरण गरिएका राहुल सिँह अहिले ट्राभल्स एण्ड टुर्स चलाएर बसेका छन् र उनी प्रेस युनियन धनुषाका राजन सिँहका भाई हुन् । यद्यपी, सिँहले यस तथ्यलाई खण्डन गर्दै आफू पत्रिकारितामा सक्रिय भएको र कहिलेकाही मात्र टुर्समा जाने गरेको दाबी गरेका छन् ।

सदस्यहरुमध्ये राम हृदय यादव पत्रकारिता क्षेत्रबाट परै बसेर गाउँमा बोर्डिँग स्कूल सँचालन गरेर बसेका छन् । महासँघको चुनाव नजिकिएपछि यादव केही दिनदेखि जनकपुरको एक मिडियामा देखाबटी काम सुरु गरेका छन् ।

नविकरण गरिएको राम अशिष यादव नामक व्यक्ति जनकपुरका पत्रकार वृज कुमार यादवको भाई हुन् । उनी कहिले पनि पत्रकारिता क्षेत्रमा सक्रियता नजनाएपनि पुरानो रेकर्ड अनुसार नविकरण गरिएको महासँघका सचिव पुरन गुप्ताले जनाए ।

त्यसमै अकुल प्रसाद प्रेस युनियन धनुषाका भएपनि उनी कम्प्युटरको पसल खोलेर बसेका छन् । उनी नामको लागि मात्र पत्रकारिता क्षेत्रमा रहेको बताइएको छ । यद्यपी, उनले आफू पत्रकारिता पनि गर्दै गरेको र साइड बिजनेसको रुपमा कम्प्युटरको पसल सँचालन गरेको स्वीकारे । “मात्र पत्रकारिता गरेर परिवारको जीविका चल्छ, परिवार पाल्नु परेन”– उनले भने ।

नविकरणको क्रममा चन्दा कुमारी साहको पनि नविकरण गरिएको छ । उनी कहिल्यै पनि पत्रकारिता नै नगरी सदस्यता लिएको बुझिएको छ । उनी पत्रकार महासँघ प्रदेश २ का एवम् पत्रकार प्रवीण साहकी श्रीमति हुन् । उनी पनि पत्रकारितामा सक्रिय रहेको दाबी पत्रकार प्रवीण साहको छ ।

यस्तै, सँजीव कुमार साह पत्रकारिता छाडेको बर्षौ भएपनि उनको सदस्यता भने नविकरण गरिएको छ । साह अहिले पनि बिमा कम्पनीमा कार्यरत छन् र हालै प्रेस मँचमा प्रवेश गरेका छन् ।

सदस्यता प्रदान गरिएको मध्ये प्रफुल्लराज घिमिरे भने नेपाली काँग्रेसका नेता हुन् । उनी राजनीतिमा सक्रिय नेताको रुपमा चिनिन्छ र उनलाई पनि सदस्यता प्रदान गरिएको छ ।

यसअघि महासँघको सदस्यता पाएका केही सक्रिय पत्रकारहरुको नाम भने सदस्यबाट हटाइएको छ । उनीहरुलाई फेसबुकमा लेखेको भन्दै सदस्यता नविकरण नगरेको पत्रकार महासँघ धनुषाका सचिव पुरन साहले बताए ।