मालपोतका हाकिम ७९ हजार र वडासचिव ४ लाख रुपैयाँ सहित पक्राउ

न्यूज ब्यूरो, जनकपुरधाम । अख्तियार दुरुपयोग अनुसन्धान आयोगले मालपोतका एक हाकिमलाई ७९ हजार रुपैयाँ सहित पक्राउ गरेको छ ।

भूमिसुधार तथा मालपोत कार्यालय कञ्चनपुरका मालपोत अधिकृत लोकराज जोशीलाई अख्तियारको टोलीले पक्राउ गरेको हो ।

जग्गा नामसारी तथा अंशबण्डा गरिदिएवापत सेवाग्राहीसँग अतिरिक्त रकम माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय कञ्चनपुरबाट खटिई गएको टोलीले उनलाई सो रकम सहित पक्राउ गरेको हो ।

अधिकृत जोशीलाई सेवाग्राहीबाट लिएको २४ हजार रुपैयाँ र स्रोत नखुलेको ५५ हजार रुपैयाँ गरी जम्मा ७९,००० रुपैयाँ रकमसहित मालपोत कार्यालय कञ्चनपुर नजिकै रहेको सिटी क्याफे पछाडिबाट नियन्त्रणमा लिएको जनाइएको छ ।

उनलाई अख्तियारको टोलीले नियन्त्रणमा राखेर अनुसन्धान कार्य अघि बढाएको अख्तियारका प्रवक्ता नारायण प्रसाद रिसालले जनाएका छन् ।

यसका साथै, एक वडासचिव समेत ४ लाख रुपैयाँ सहित पक्राउ परेका छन् । काठमान्डौ महानगरपालिका वडा नम्बर ३० का वडा सचिव (अधिकृत छैठौं तह) भरत कुमार पोखरेल सो रकम सहित पक्राउ परेको हो ।

सचीव पोखरेलले निर्माण कार्य सम्पन्न पश्चात बिल भुक्तानी दिएवापत सेवाग्राहीसँग अतिरिक्त रकम माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोग टंगालबाट खटिई गएको टोलीले सेवाग्राहीबाट ४ चार लाख रुपैयाँ अतिरिक्त रकम लिइसकेको अवस्थामा पक्राउ गरिएको हो ।

उनलाई उनको कार्यकक्षबाटै पक्राउ गरिएका जानकारी दिएको हो ।