फेरी ललिपप बाड्दै राजपा

राष्ट्रिय जनता पार्टी नेपालले फेरी मधेशमा ललिपप बाड्न थालेका छन् । उसले मधेश आन्दोलनमा मारिएका शहीद परिवारलाई ५० लाख रुपैयाँ दिने घोषणा गरेको छ ।

यसअघि राजपाकै एकघटक तत्कालीन सद्भावना पार्टीका अध्यक्ष राजेन्द्र महतोले मधेश आन्दोलनमा शहीद हुनेको परिवारलाई ५० लाख दिने उधारो घोषणा गरेका थिए । शहीद परिवारहरुको उक्त रकम उधारै बाँकी राखेका राजपाले चुनाव जितेपछि ५० लाख दिने घोषणा गरेको हो ।

पुरानोे बक्यौता ५० लाख तिर्न नसकेका राजपाले महोत्तरीको जलेश्वरमा पार्टीको घोषणापत्र सार्वजनिक गर्दै मधेश आन्दोलनका सम्पूर्ण शहीदलाई प्रति परिवार ५०÷५० लाख दिने घोषणा गरेको हो । घोषणापत्र सार्वजनिक कार्यक्रममा बोल्दै राजपा नेता राजेन्द्र महतोले दुई नम्बर प्रदेशमा राजपा–फोरम गठबन्धनको सरकार बन्ने दाबी गरे ।

‘मधेश प्रदेशको सरकारले शहीद परिवारलाई ५०/५० लाख दिनेछ,’ महतोले भने । संयुक्त लोकतान्त्रिक मधेशी मोर्चाले आन्दोलनको आह्वान गरेसँगै आन्दोलनमा शहादत दिनेलाई ५०/५० लाख रुपैँया दिने विवादास्पद निर्णय गर्दा निकै आलोचना भएको थियो ।

राजपाको चुनावी घोषणापत्रमा ५० लाख दिने कुरा उल्लेख नभएपनि दुई नम्बर प्रदेशमा आफ्नो सरकार बन्ने निश्चित भएको र प्रादेशिक सरकारद्वारा उक्त रकम उपलब्ध गराउने नेता महतोले जानकारी दिए ।

शहीद परिवारलाई आर्थिक सहयोग वाहेक प्रादेशिक सरकार अन्तर्गत आउने सरकारी जागिर उपलब्ध गराउने, शहीद परिवारका बच्चाहरूको निःशुल्क अध्ययनको व्यवस्था गरिने, शहीद परिवारलाई स्वरोजगारको लागि छुट्टै आर्थिक सहायता उपलब्ध गराउने पनि नेता महतोले प्रतिवद्धता जनाए ।

‘मधेश आन्दोलनमा शहादत दिएका कारण नै देशमा संघीयता आएको र आफ्नै प्रदेशमा आफ्नै सरकार बन्ने सपना साकार हुँदैछ’ महतोले भने, ‘शहीदको सम्मानमा कुनै आँच आउन नदिने र शहीद परिवारको सम्पूर्ण जिम्मेवारी मधेश सरकारमाथि हुनेछ ।’