छठमा दुई दिन सार्वजनिक बिदा, देउवा सरकारपछि दोस्रोपटक यस्तो निर्णय

न्यूज ब्यूरो, जनकपुरधाम । सरकारले यस वर्ष छठ पर्वको अवसरमा लगातार दुई दिन सार्वजनिक बिदा दिने निर्णय गरेको छ । गृह मन्त्रालयले शुक्रबार सूचना जारी गर्दै आइतबारसँगै सोमबार पनि सार्वजनिक बिदा दिने जनाएको हो ।

यसअघि छठ पर्वको मुख्य दिन कात्तिक २९ गते आइतबार सार्वजनिक बिदा दिइसकिएको थियो । तर, छठ पर्वको भोलिपल्ट बिहान उदाउँदो सूर्यलाई अर्घ्य दिएर व्रत समापन गर्ने परम्परालाई मध्यनजर गर्दै सरकारले कात्तिक ३० गते सोमबार पनि सार्वजनिक बिदा दिने निर्णय गरेको हो ।

गृह मन्त्रालयका सहसचिव एवं प्रवक्ता आनन्द काफ्लेद्वारा जारी सूचनाअनुसार यस निर्णयसँगै छठ पर्वका अवसरमा आइतबार र सोमबार गरी लगातार दुई दिन सार्वजनिक बिदा हुने भएको छ ।

नेपालमा संघीय सरकारले छठ पर्वका अवसरमा दुई दिन सार्वजनिक बिदा दिने अभ्यास यसअघि २०७४ सालमा तत्कालीन प्रधानमन्त्री शेरबहादुर देउवा नेतृत्वको सरकारले गरेको थियो । त्यसपछि यस वर्ष पुनः संघीय सरकारले छठमा दुई दिन बिदा दिने निर्णय गरेको हो ।

छठ पर्वमा पहिलो दिन अस्ताउँदो सूर्यलाई अर्घ्य दिइन्छ भने दोस्रो दिन बिहान उदाउँदो सूर्यलाई अर्घ्य दिएपछि व्रतालुले पारण गरी चारदिने पर्व सम्पन्न गर्छन् ।