धेरै पटक नेताहरुले ठगे, यसपाली जनताले नेतालाई ठगे, एमाले अब सचेत छः मन्त्री दास

न्यूज ब्यूरो, जनकपुरधाम । मधेश प्रदेश सरकारका खेलकूद तथा समाज कल्याण मन्त्री लखन दासले धेरै पटक यी नेताहरुले जनतालाई ठगेपछि यसपाली जनताले नै नेतालाई ठगेको बताएका छन् ।

नेकपा एमालेको वडा दशै, दिपावली तथा छठ पर्वको शुभकामना आदान प्रदान कार्यक्रममा बोल्दै मन्त्री दासले धनुषा निर्वाचन क्षेत्र नं. २ का एक नेतालाई लक्षित गर्दै जनतालाई ठग्दा यसपाली जनताले ठगेको बताए ।

एमालेको कमला नगरपालिका कमिटीले आयोजना गरेको शुभकामना आदान प्रदान कार्यक्रममा दासले एमालेको बारेमा भ्रम छर्दा एमाले जनतामा जान नसक्दा यस्तो परिणाम आएको बताए । एमालेका साँसद समेत रहेका दासले नयाँ पार्टीहरु जनताविरोधी भएको, भ्रष्ट भएको भनिरहँदा त्यस भ्रमलाई चिर्न नसक्दा एमालेप्रति जनताको रिस बढेको बताए । समयमै जवाफ दिन नसक्दा तथा जनता माझ नजानुको परिणाम यस चुनावले सन्देश दिएको बताए ।

जेनजी आन्दोलनको जिकिर गर्दै मन्त्री दासले आन्दोलन किन, कसको ईसारामा र कसरी भएको कसैसँग नलुकेको बताउँदै कमला नगरपालिका एमालेको गढ भएपनि थोरै मत आउनु एमालेप्रतिको गद्दारी रहेको बताए ।

उनले चुनावको बेला नेता उमाशंकर अरगरियाको नोमिनेशनमा ७ हजार बढी एमाले कार्यकर्ताहरु गएकोमा मत मात्र १० हजार आउनु पार्टीभित्र गद्दारी भएको बताए । उनले त्यत्रो कार्यकर्तामा प्रत्येक घरबाट मात्र २ मत आएको भए १४ हजार मत आउने उसको आंकलन थियो । ३६४ दिन पार्टीप्रति ईमान्दार हुने नेता कार्यकर्ताहरु १ दिन चुनावको दिन बेइमानी गर्दा यस्तो परिणाम झेल्नुपरेको बताए ।

उमाशंकरसँग मेरो विवाद छैनः दास

नेता दासले नेकपा एमालेका प्रत्यासी साँसद उमाशंकर अरगरियासँग आफ्नो कुरा लगाएको भन्दै त्यस्तो केही विवाद नरहेको बताए । चौक चौराहामा लखन दास र उमाशंकरबीचको झगडाको कारण कम मत आएको दाबीप्रति दासले मिथ्या र निराधार भ्रम छरिएको बताए । उनले आफ्नो दलका नेताप्रति आफू सधैँ ईमान्दार रहेको दाबी गरे ।

आगामी स्थानीय तह निर्वाचनको लागि छुटेका नेता कार्यकर्ताहरुलाई जोडने अभियान यथाशिघ्र सँचालन गर्न उनले निर्देशन समेत दिए ।

कार्यक्रममा नगर कमिटीका अध्यक्ष दीपेन्द्र यादव, जिल्ला सचिव दिप नारायण ठाकुर लगायतका नेता कार्यकर्ताहरुको सहभागिता रहेको थियो ।