मधेश सरकारको अध्यादेश प्रदेश प्रमुख अहिराजले गरे फिर्ता !

न्यूज ब्यूरो, जनकपुरधाम । प्रदेश नम्बर २ का प्रदेश प्रमुख राजेश अहिराजले मधेश सरकारले पठाएको दुई अध्यादेश फिर्ता गरिदिएका छन् ।

बुधबार प्रदेश नम्बर २ को सरकारले प्रमाणिकरणको लागि पठाएको दुई अध्यादेशलाई फिर्ता गरेका हुन् । यसअघि कैयौं विद्येयक पारित मधेश सरकारले गरिसकेका छन् ।

नव नियुक्त प्रदेश प्रमुख राजेश अहिराजले मधेश सरकारबाट गएको स्वास्थ्य सम्बन्धी व्यवस्थापन गर्न बनेको विधेयक र प्रदेश पदक सम्बन्धमा व्यवस्था गर्न बनेको विधेयक लाई टेबुलबाट फिर्ता गरिदिएका हुन् ।

सामाजिक विकास मन्त्रालयले स्वास्थ्य सम्बन्धी व्यवस्थापन गर्न बनाएको विधेयक पारित गराएर प्रमाणीकरणका लागि प्रदेश प्रमुखको कार्यालयमा पठाएको थियो । विद्येयक हेरेपछि प्रदेश प्रमुख अहिराजले त्रुटि देखाउँदै पुनः पेश गर्ने गरी फिर्ता पठाएको बुझिएको छ ।

प्रदेश प्रमुख अहिराजले मधेश सरकारबाट पेश गरिएको सो विधेयकमा मातृत्व सुरक्षा लगायतका विषय वस्तुहरु नसमेटिएको भन्दै आवश्यक सुझाव सहित परिमार्जन गरेर ल्याउन भन्दै प्रदेश प्रमुखले फिर्ता गरिदिएका हुन् ।

त्यसैगरी प्रदेश पदक सम्बन्धमा व्यवस्था गर्न बनेको विधेयक प्रदेश प्रमुखको कार्यालयमा पठाइएको थियो । सो विधेयकमा किसान लगायतकाहरुलाई पदक दिने व्यवस्था नगरिएको भन्दै सुझाव सहित प्रदेश सभालाई विधेयक फिर्ता पठाइएको प्रदेश प्रमुखको कार्यालयले जनाएको छ ।

प्रदेशभित्र विशिष्ठ योगदान दिने व्यक्तिहरुलाई सम्मान गर्नका लागि प्रदेश सरकारले पदक प्रदान गर्ने सम्बन्धमा कानुनी व्यवस्था गर्नको लागि विधेयक निर्माण गरेको थियो ।

सरकारले यसै चालु आर्थिक वर्षमा पदक वितरणको लागि करिब १० लाख रुपैयाँ पनि विनियोजन गरिसकेको छ । विधेयकमा प्रदेश स्थापना पूर्व नै नाम घोषणा गरी स्थापनाको दिन फागुन ३ गते पदक दिने गरी विधेयक प्रदेशसभाबाट पारित गराएको थियो ।

मधेश सरकारको प्रदेशसभाबाट हालसम्म ३९ वटा विधेयक प्रमाणीकरण भएको छ । प्रमाणीकरणसँगै ऐन बनेपनि अधिकांश ऐन संघीय ऐनको अभावमा कार्यान्वयन हुन सकेको छैन ।

सरकारका प्रवक्ता समेत रहेका आन्तरिक मामिला तथा कानून मन्त्री ज्ञानेन्द्र कुमार यादवले प्रमाणीकरणको लागि पठाइएको विधेयक प्रदेश प्रमुखले सुझाव सहित बढीमा दुई पटक मात्रै फिर्ता गर्न सक्ने बताए ।

प्रदेश प्रमुख अहिराज केही दिन अघि मात्र प्रदेश नम्बर २ को लागि प्रदेश प्रमुखको कार्यभार सम्हालेका छन् ।