मन्त्री प्रभु साहको बारेमा लेखेको भन्दै 'यादवराज' को धम्की (अडियो सहित)

न्यूज ब्यूरो, जनकपुरधाम । शहरी विकास मन्त्री प्रभु साहको बारेमा फेसबुकमा लेखेको भन्दै मन्त्री साह निकट एक व्यक्तिले एक विद्यार्थीलाई फोन मार्फत धम्काएका छन् ।

काठमान्डौंमा बसेर अध्ययनरत कानुनका विद्यार्थी राजा हुसेनलाई प्रभु साह सचिवालयको निकट रहेको राजकुमार यादव उर्फ 'यादवराज' ले हुसेनलाई फोन गरी धम्काएका छन् ।

हुसेनलाई यादवराजले फोन गरी साईबर क्राईमको मुद्दा हाल्ने चेतावनी सहित धम्की समेत दिएका हुन् । हुसेनले प्रभु साहले लगाउन लागेको मेलाको क्रममा एक महिलाको गहुँ बाली नष्ट गरिदिएको सम्बन्धी भिडियो हालेपछि उनलाई धम्की गएको बताएका छन् ।

विद्यार्थी हुसेनले केही दिन अघि गरेको एक पोष्टलाई लिएर आफू सिडिओ अफिसमा तारिख लिइरहेको भन्दै हुसेनलाई समेत तारिख लिनको लागि तयार रहन अडियोको सुरुमै भनेका छन् । यसका साथै उनले केही दिनभित्रै हातमा एक पत्र पाउने भनेर भनेका छन् ।

हुसेनलाई आफू प्रभू साहको सचिवालयबाट बोलेको भन्दै फेसबुकमा लेखेपछि साईबर क्राईमको मुद्दा हाल्ने भनेर चेतावनी दिएको प्रष्ट सुन्न सकिन्छ ।

उनले भनेका छन्,–“जसरी मलाई मुद्दा खेप्नु परेको छ नी, अब त्यस्तै तपाईलाई पनि मुद्दा लाग्नेछ । यो कुरा डायरेक्ट सिडिओ साहब कहाँ पुगेको छ । तपाईलाई पनि एउटा पत्र आउँछ, साईबर क्राईम सम्बन्धी मुद्दाको । तपाईले धेरै राम्रो स्टेटस लेख्नुभएको छ ।”

रौतहटका प्रमुख जिल्ला अधिकारी (सिडिओ) ईन्द्रदेव यादवले रौतहटमा समाजिक सँजालमा मनोमानी ढँगले लेख्ने, भ्रामक कुराहरु लेख्नेलाई कारवाही गर्ने कुरा भनेपछि विद्यार्थी राजा हुसेनले आफनो फेसबुकमा प्रजिअलाई औल्याउँदै यसलाई धम्कीको रुपमा लिउँ की सल्लाहको रुपमा भनेर स्टेटस लेखेपछि उनलाई धम्की गएको बुझिएको छ ।

यसका साथै, आईतबार मात्र हुसेनले मन्त्री प्रभु साहको बारेमा महिलाको गहुँबाली नष्ट गरेको भन्दै रोईरहेकी महिलाको भिडियो पोष्ट गरेपछि उनलाई विभिन्न ठाउँबाट धम्की सुन्नुपरेको उनले सुनाएका छन् ।