नेता रामचन्द्र झा, उदय बरबरिया र मातृका काठमान्डौं रिफर !

न्यूज ब्यूरो, जनकपुरधाम । आज जनकपुरमा भएको प्रहरी र नेकपाका नेता कार्यकर्ताबीचको झडपमा परी घाईते भएका ४ जनालाई काठमान्डौं रिफर गरिएको छ ।

नेकपा प्रचण्ड–माधव समूहले आह्वान गरेको देशव्यापी आम हडतालको क्रममा जनकपुरमा प्रदर्शनको क्रममा प्रहरीले अन्धाधुन लाठीचार्ज गरेपछि घाईते भएका नेकपाका केन्द्रीय सदस्य एवम् पूर्व मन्त्रीद्धय रामचन्द्र झा र मातृका प्रसाद यादव सहित शहिदनगर नगरपालकाका मेयर एवम् नेकपाका प्रदेश कमिटि सदस्य उदय कुमार बरबरिया (यादव) लाई काठमान्डौ रिफर गरिएको हो ।

सोही झडपमा परी घाईते भएका नेकपाका कार्यकर्ता प्रदीप साहलाई समेत उनीहरुसँगै पठाएको हो । जनकपुरको प्रादेशिक अस्पतालमा उपचार गराएका उनीहरुलाई थप उपचारको लागि काठमान्डौं रिफर गरिएको हो ।

आज (विहिबार) करिब २ बजेको समयमा जनकपुरको शिवचोकमा प्रहरी र प्रदर्शनकारीबीच झडप हुँदा दर्जन भन्दा बढी जना घाईते भएका थिए । सो क्रममा नेता झाको टाउकोमा गम्भिर चोट लागेको छ भने मेयर बरबरियालाई खुट्टामा गम्भिर चोट लागेको बताइएको छ । मातृका र प्रदीप साहलाई पनि टाउकोमै चोट लागेको छ ।

चारै जनालाई एम्बुलेन्स मार्फत एयरपोर्ट पुगाउँदै हवाईजहाजमार्फत काठमान्डौंको लागि रिफर गरिएको हो । प्रहरीले आश्रुग्यास प्रहार गर्दै तितरबितर पारेर अन्धाधुन लाठीचार्ज गरेपछि उनीहरु घाईते भएका हुन् ।