धनुषाः इनारमा नाग देवता आएको भन्दै पूजा, गाउँ गाउँबाट सर्वसाधारणहरु आउँदै

न्यूज ब्यूरो, जनकपुरधाम । प्रदेश नम्बर २ को धनुषा जिल्ला स्थित एक इनारमा मोनोक्लेड कोबरालाई नाग देवता भन्दै स्थानीयहरुले पूजाआजा थालेका छन् ।

धनुषाको हँसपुर नगरपालिकाको वडा नम्बर ४ नरहिया स्थित एक इनारमा मोनोक्लेड कोबरा देखेपछि स्थानीयहरुले नागदेवता भन्दै पूजाआजा सुरु गरेको छ । विगत एक सातादेखि सो इनारमा रुपैयाँ, लडडु, अगरबति चढाउँदै स्थानीहरुको भीड बढन थालेको छ ।

वैज्ञानिक भाषामा सो सर्पलाई मोनोक्लेड कोबरा अर्थात दराज सर्प, पानी दराद सर्प भनेर पनि चिनिन्छ । यो सर्प एकदमै विषालु सर्पको कोटीमा राखिएको छ । यो सर्प डँसेपछि तुरुन्तै उपचार नभए मान्छेको ज्यानै जाने मिथिला वाइल्ड लाइफ ट्रस्टका अध्यक्ष देवनारायण मण्डलले बताए ।

पानी दराद सर्प इनारमा उनको फन (छत्तर) मा आकृति देखेपछि स्थानीयहरुले नाग सर्प रहेको भन्दै पूजाआजा थालेको छ । यो सर्पको फनमा हिराजस्तै चित्राआकार देखिन्छन् । सोही भएर स्थानीयहरुले नाग देवता भन्दै पूजाआजा थालेको छ ।

इनारमा सर्प एकजनाले देखेपछि स्थानीयहरुलाई बोलाएको थियो । त्यसपछि सो ठाउँका वृद्धवृद्धाहरुले नाग देवता भन्दै प्रचार गरेपछि विभिन्न ठाउँबाट सर्वसाधारणहरु सो इनारमा नाग सर्प भन्दै हेर्न आएका छन् ।

सोमबार मात्र एक वृद्ध सो इनारमा कुदेर सर्पलाई ढोग्न गएको भिडियो पनि राखिएको थियो । सो सर्प इनारभित्रै रहेको दुलोमा पसेकोले त्यतिबेला बृद्धलाई केही पनि नगरको बताइएको छ । इनार सुकेपछि सो कोबरा सर्प देखिएको हो ।

ट्रस्टका अध्यक्ष मण्डलले सर्पको नजिक गएर जिस्काउन नहुने तथा सो गरेमा टोक्न सक्ने सम्भावना रहेकोले सतर्क रहन आग्रह गरेका छन् । खवर पाएलगत्तै सर्पको उद्धारको लागि सो स्थल पुगेका मण्डलका टोलीलाई स्थानीयहरुले उद्धार गर्न दिएनन् ।

उनीहरुले नाग देवता रहेको भन्दै केही पनि गर्न नदिने अडान राखेको बताउँदै यो सर्प घाम ताप्नका लागि मात्र बाहिर निस्कने गरेको बताए । अहिले गाउँ गाउँबाट हेर्नेहरुको भीड आउने गरेको छ ।