नरहा गाउँपालिकाको बजेट झण्डै ३८ करोड

न्यूज ब्यूरो, सिरहा । नरहा गाउँपालिकाको चौथो गाउँसभा अन्ततः सम्पन्न भएको छ ।

गाउँपालिकाले चालु आव २०७७र७८ का लागि ३७ करोड ८१ लाखको बजेट, नीति तथा कार्यक्रम पारित गरेको छ । सडक, सिचाई, शिक्षा, स्वास्थ्य, कृषि, स्वरोजगार तथा अन्य विकाससँगै दक्ष जनशक्ति उत्पादन गर्नमा सहयोग पुग्ने गरी बजेट ल्याइएको गापाका प्रमुख प्रशासकीय अधिकृत सुजित कुमार यादवले बताए ।

कार्यपालिका र प्रशासनिक वातावरण नमिलेर गाउँसभा हुनमा ढिलाई भइरहेको अवस्थामा हाजिर भएकै दिनदेखि नियमित रुपमा गरिएको प्रयासले सोचेको भन्दा कम समयमा सकारात्मक परिणाम आएर चौथो गाउँसभा सम्पन्न भएको बताउँदै उनले गाउँपालिकाभित्रका जनताको हरेक गुनासोलाई प्रशासनिक तवरले सुनुवाई गर्ने प्रयास गरिने उनले प्रतिबद्धता जनाए । कानूनी प्रक्रियालाई टेकेर गाउँ कार्यपालिकाले पारित गर्ने हरेक नीति तथा कार्यक्रमलाई प्रशासनिक तवरबाट व्यवहारमा कार्यान्वयन गर्न आफु सहयोगकारी भुमिका निर्वाह गर्ने उनले सबैलाई विश्वास दिलाए ।

अविकसित ग्रामिण भेगको रुपमा रहेको नरहा गाउँपालिकाको विकासमा सबैको साथ रहदै आएको हुँदा ‘सबैको साथ सबैको विकास’ नाराका साथ आफु अघि बढ्दै आएको नरहा गाउँपालिकाका अध्यक्ष रामशरण यादवले बताए ।

सबैको सकारात्मक सहयोगको बलमा विगतका वर्षहरुमा सफलतापूर्वक काम सम्पन्न भएको हुँदा आउने वर्षहरुमा समेत सबैको सहयोगको अपेक्षा राखेको उनले काम गर्ने क्रममा हुन गएका केही त्रुटिलाई प्रष्ट रुपमा औल्याई काममा सहजता प्रदान गर्न सबैसँग आग्रह गरे ।

गाउँपालिकाको कुनै पनि कार्यक्रम वा विकास निर्माणका योजनामा कसैलाई काँखा र पाखा गर्ने मनसाय नभएको प्रष्ट पार्दै उनले भेदभाव गरेको जस्तो कसैलाई लागेमा सिधै आफुनिर कुरा राख्न थपे । प्रक्रियागत सही गुनासो र सुझाव आए त्यसलाई व्यवहारमा लागु गर्ने आफु पूर्ण प्रतिबद्ध रहेको उनले सुनाए ।

गापा अध्यक्ष रामशरणको अध्यक्षतामा भएको चौथो गाउँसभा समारोहमा वडाध्यक्ष, कर्मचारी, समाजसेवी, बुद्धिजीवी तथा अन्य सरोकारवालाहरुको सहभागीता रहेको थियो ।