जनकपुरः मठ–मन्दिरको जग्गामा महन्थको बपौती, मन्दिरको १७ कठ्ठा जग्गा बेच्न लागेको खुलासा

न्यूज ब्यूरो, जनकपुरधाम । जनकपुरधाममा रहेको मठ मन्दिरको जग्गामा विभिन्न समयमा मन्दिरका महन्थहरुले आफ्नो बपौती झैं आफूखुसी जग्गा विक्रि वितरण गर्दै आएको देखिएको छ ।

सोही क्रममा जनकपुरधामउप–महानगरपालिका वडा नं. ८ बिहार कुण्डस्थित सीता विहारी कुण्डका महन्थ रामसेवक दासले मन्दिरको जग्गा विक्री वितरण गर्ने प्रयास गरेको जनकपुरबाट प्रकाशित हुने टुडे एक्सप्रेसमा पत्रकार कमलेश ठाकुरले समाचार लेखेका छन् ।

महन्थ दासले अनाधिकृत रुपमा जग्गा माफियासंग मिलेर मन्दिरको जग्गा ९९ वर्ष भोग चलन गर्न पाउने भन्दै पैसा लिएर विक्री गर्न लागेका हुन् । मन्दिरका पूजारी सियाराम दासको अनुसार वडा नम्बर १३ कबर्डहल नजिकको सिट नम्बर १३१४–०५ कित्ता नम्बर २३ को १२ कठ्ठा १३ धुर र सिट नम्बर १२७४–२५ कित्ता नम्बर १७ को पाँच कठ्ठा १४ धुर तीन कनमा जग्गा बेच्न स्थानीय दिनेश साहसंग बैनासमेत गरिसकेका छन् भनेर समाचारमा उल्लेख छ ।

भगवानको मन्दिरको नाममा रहेको जग्गा पछिल्लो समय व्यक्तिगत नाममा ल्याएर महन्थ दासले धमाधम विक्री गरिरहेको उनको आरोप छ । मन्दिर प्राङ्नमै रहेको करिव अढाई कठ्ठा जग्गासमेत उनले एक महिलाको नाम उपभोग गर्न पाउने भन्दै कागज गरिदिएका छन्। मन्दिरको प्राङ्गनमा रहेको घरमा भाँडा लिएर बस्दै आएकी रानीबत्ती ठाकुरको नाममा सय वर्ष भोगचलन गर्न पाउने भन्दै कागजात बनाएको उनको भनाइ छ ।

‘पहिला ठाकुरले दश वर्षको लागि घरसहित करिव साढे तीन कठ्ठा जग्गा लिजमा लिएकी थिइन् ,’उनले भने, ‘त्यसको दश वर्ष नबित्दै फेरि सय वर्ष भोगचलन गर्न पाउने भन्दै कागज ‘तमसुक’ गरदिएका छन्।’ रामबत्तीले मन्दिरसंग ०७० सालमा दश वर्षको लागि लिजमा लिएकी थिइन्। तर, दश वर्ष नपुग्दै महन्थ दासले आफूलाई सेवा गरेकोे भन्दै ०७६ बैशाख १ गते सय वर्ष भोगचलन गर्न पाउने कागजात गरेको पाइएको छ ।

पूजारी सियारामले मन्दिरको जग्गा नबेच्न विभिन्न निकाय धाएर रोक्ने प्रयास गरेकोे भन्दै आवश्यक कागजात आधारमा रोक्का गर्न नसकेको उनले सुनाए ।

मन्दिरको जग्गा सुरुमा महन्थ दासले संतोष मिश्रालाई वारिसनामा दिएर विक्री वितरण गने गरेका थिए । तर, पछिल्लो समय सरकारले मन्दिरको जग्गा विक्री वितरणमा रोक लगाएपछि मिश्राको वारिसनामा खारेज भएको थियो।

महन्थ दाससंग दोहोरो नागरिकतासमेत रहेको पाइएको छ । महन्थ दाससंग भारतीय र नेपाली दुबै नागरिकता समेत रहेको पाइएको हो। महन्थ दासको भारतमा शिवराम कुमार र नेपालमा रामसेवक दास नामले नागरिकता रहेको छ ।

भारतीय आधार कार्ड उनले रामसेवक दासकै नामले बनाएका छन् भने अर्को आधार कार्ड शिवराम कुमारका नामले बनाएका हुन्। सबै कार्डमा तस्बीर महन्थ दासकै रहेको छ ।