नेपाल-भारत सीमा बन्द भएपनि भन्सारमा राजस्व बढयो

न्यूज ब्यूरो, सिरहा । भारतीय सीमा नाका नखुले पनि सिरहाको विभिन्न भन्सार नाकाबाट अपेक्षाकृत भन्दा बढी राजस्व उठेको छ । भन्सार कार्यालय ठाडी सिरहाले चालु आर्थिक वर्ष २०७७/७८ को पाँच महिनाको अवधिमा रु चार करोडभन्दा बढी राजश्व सङ्कलन गरेको छ ।

कोरोना भाइरसको सङ्क्रमण फैलिन नदिन सरकारले भारतीय सीमा नाका बन्द गरेकै अवस्थामा ठाडी भन्सारले चालु आ.व.को साउनदेखि मङ्सिरसम्मको अवधिमा रु चार करोड ८९ लाख ४५ हजार राजश्व सङ्कलन भएको जनाएको छ ।

चालु आव २०७७/७८ मा रु छ करोड ३० लाख लक्ष्य तोकिएकामा पाँच महिनाकै अवधिमा लक्ष्यको करिब ६० प्रतिशत राजश्व सङ्कलन गर्न सफल भएको भन्सार प्रमुख नरेश साहले जानकारी दिनुभयो । भारतबाट गहुँ, चामल, आलु, प्याज, फलफूल, बेसार र तरकारीलगायतका सामग्रीको आयात बढेको र खाद्यान्न सामग्री आयतमा भन्सार वृद्धि भएकाले राजश्व सङ्कलनमा वृद्धि भएको प्रमुख साहको कथन छ ।

अघिल्लो आव २०७६/७७ मा सो कार्यालयले रु. सात करोड १६ लाख ७९ हजार राजश्व सङ्कलन गरेको थियो ।