मैथिली संगीत-सिने क्षेत्रमा नव आयाम थप्दै 'नैना नुकाकऽ'

न्यूज ब्यूरो, सप्तरी । मैथिली गीत–सङ्गीतमा प्यारोडी र अश्लीलता हावी भईरहँदा पछिल्लो पटक ‘दिलके डायरी’ नामक मैथिली भाषाको म्युजिक भिडियो पछि 'नैना नुकाकऽ जे तकलौँ' सार्वजनिक भएको छ ।

OSR Digital यु - ट्यूब चैनल मार्फत च्यानलबाट उक्त गीत आईतवार साँझ ३:०० बजे सार्वजनिक भएको हो । प्रसिद्ध गायक नितिन गजुरेल र बहुचर्चित युवा गायिका ज्योती विश्वकर्माको स्वरमा रहेको उक्त गीत मैथिली गीत–सङ्गीतको क्षेत्रमा नौलो आयाम नै सिद्ध भएको छ ।

मैथिली संगीतको चर्चित युवा गीतकार विद्यानन्द वेदर्दीको शब्द रहेको उक्त म्युजिक भिडियोमा देशकै ख्यातीप्राप्त अभिनेत्री अञ्जली अधिकारी र मैथिली सिने जगतको चर्चित युवा फेस मोडेल अशोक आर्यन यादवको प्रेमिल अभिनय रहेको छ। उक्त गीतको सङ्गीत कम्पोज नितिन गजुरेल र सङ्गीत संयोजन राजीव साहले गरेका छन् ।

प्रसिद्ध कोरियोग्राफर एवं निर्देशक सुरेन्द्र बसेलको निर्देशन रहेको छ । बुद्ध थापाले छायाङ्कन गरेको उक्त गीतको ईडिट, कलरिङ्ग र पोस्टर डिजाइन विष्णु थापाले गरेका छन् । उक्त गीति भिडियोको प्रस्तुति मिथिला अभियन्ता विद्यानन्द वेदर्दीको रहेको छ बने पोस्ट प्रोडक्शन सफल मोसन पिक्चरले गरेको हो।

गायक नितिन गजुरेलको यो दोस्रो मैथिली गीत हो। मैथिली भाषाको म्युजिक भिडियोहरुमध्ये ‘नैना नुकाकऽ जेँ तकलौँ तँ प्रीत भऽ गेलै ’ ले गुणस्तरियता समेतलाई ध्यानमा राख्दै सम्पूर्ण प्रेमिल मन भएका श्रोताहरूलाई लक्षित गरेर मैथिली भिडियोको मुहार फेर्न सभ्य, सु-सज्जित सिनहरू राखेर पारिवारिक माहोलमा सुच्चा स्नेहको संचार हुन सक्ने उद्देश्यले यो भिडियोलाई तैयार गरिएको गीतकार विद्यानन्द वेदर्दीले जानकारी दिए ।

उनका अनुसार ‘नैना नुकाकऽ' मैथिली क्षेत्रमा बढ्दै गएको अश्लीलता हटाउन चाहने निरन्तर प्रयासमा लागेका सामाजिक अभियानमा चिन्तनशील विचारधाराका श्रोताहरूलाई औधी मन पराउने निर्माण पक्षको अपेक्षा छ । नेपाली भाषा गीत–सङ्गीत क्षेत्रमा छुट्टै पहिचान बनाएका र मैथिली जगतमा पहिचान बनाई रहेका कलाकारहरूको सहभागिता रहेको यो मैथिली गीत मैथिली-सिने महलको लागि एउटा भरयाङ्ग थप्ने कार्य गर्ने छ।