नेकपा धनुषाको १ हजार १११ सदस्यीय सँघर्ष समिति

न्यूज ब्यूरो, जनकपुरधाम । सँसद विघटनपछि भएको नेकपाको विभाजनले देशको विभिन्न ठाउँमा प्रचण्ड–माधव गुटले सँघर्षका कार्यक्रमहरु घोषणा गर्ने क्रम जारी छ ।

सोही क्रममा नेपाल कम्यूनिष्ट पार्टी (नेकपा) को धनुषा जिल्ला कमिटिले ओलीको कदम विरुद्ध तथा सँसद विघटनको विरुद्ध सँघर्ष गर्न १ हजार १ सय ११ सदस्यीय सँघर्ष समिति गठन गरेको हो ।

शनिबार जनकपुरमा नेकपाका केन्द्रीय सदस्य एवम् धनुषा जिल्ला ईन्चार्ज नेता श्रवण कुमार बरबरिया(जीवन) को अध्यक्षतामा बसेको बैठकले सुधिर प्रसाद साहको सँयोजकत्वमा १ हजार १११ सदस्यीय सँघर्ष समिति गठन गरेको हो ।

पूर्वमन्त्री समेत रहेका नेता राम चन्द्र झाको प्रमुख आतिथ्यमा सम्पन्न भएको बैठकबाट गठन गरिएको सँघर्ष समितिले जिल्लामा हुने विभिन्न सँघर्षका कार्यक्रमहरुलाई मूर्तरुप दिने बुझिएको छ ।

प्रदेश साँसद समेत रहेका प्रचण्ड पक्षधर नेता सत्रुध्न महतो सहित नेता यदुवंश झा, श्री प्रसाद साह, लाल गोईत, बोधमाया यादव लगायतको विशेष उपस्थितिमा गठन गरिएको सँघर्ष समितिको सचिवमा भने दिपक यादवलाई चयन गरिएको हो ।

सोही बैठकबाट पुस २१ गते मँगलबार धनुषाको सबै स्थानीय तहमा बैठक बस्ने निर्णय समेत गरिएको हो ।