मोटरसाईकलको सिटभित्र १२ बोरको नलकटुवा पेस्तोल

न्यूज ब्यूरो, रौतहट । मोरटसाईकलको सिटमुनी लुकाएर राखेको १२ बोरको नलकटुवा पेस्तोल सहित प्रहरीले एक जनालाई पक्राउ गरेको छ ।

प्रदेश नम्बर २ को रौतहट जिल्लाको कटहरिया नगरपालिका वडा नम्बर ७ बगही टोलबाट विशेष सूचनाको आधारमा एक युवकलाई पेस्तोल सहित पक्राउ गरिएको जिल्ला प्रहरी कार्यालय रौतहटले जनाएको छ ।

गत मँसिर २९ गते सोमबार करिब ४ः३० बजेको समयमा गोप्य सूचनाको आधारमा जिल्लाबाट खटि गएको प्रहरीको गस्ती टोलीले बगही टोल स्थित सडकमा पुग्दा संकित रुपमा उत्तर मोहडा गरी खडा रहेको बिआर ३० डब्लु ४८७३ नम्बरको हिरो कम्पनीको स्पेलेण्डर मोटर साइकललाई चेकजाँद गर्दा १२ बोरको नलकटुवा पेस्तोल बरामद भएको हो ।

मोटरसाईकलमाथि शंका लागी खानतलासी गर्दा मोटर साइकलको सिट कभर भित्र १२ बोरको नल कटुवा बन्दुक लुकाई राखेको अवस्थामा फेला परेको भन्दै प्रहीले मोटर साइकल चालक सोही ठाउँ बस्ने बर्ष २० को राजमहम्मद आलमलाई पक्राउ गरेको हो ।

आलमलाई ५ दिनको म्याद थप गरी सो विषयमा थप अनुसन्धान गरिरहेको जिल्ला प्रहरी कार्यालय रौतहटले जनाएको छ ।