कडा विरोधको बाबजुद कमला नगरपालिकाको परिषद्, ६२ करोड बजेट प्रस्तुत

न्यूज ब्यूरो, जनकपुरधाम । कडा विरोधको बाबजुद पनि धनुषाको कमला नगरापलिकाको नगर परिषद् सोमबार विधिवत रुपमा सम्पन्न भएको छ ।

विभिन्न समयको खर्च विवरणहरुको हिसाबकिताबको माग गर्दै जनता समाजवादी पार्टीले विरोध जनाएपनि नगर परिषद्बाट आर्थिक वर्ष २०७७/०७८ को लागि करिब ६२ करोड रुपैयाँ बजेट प्रस्तुत गरिएको हो ।

कमला नगरपालिकाका नगर प्रमुख राम उदगार गोईतको अध्यक्षता तथा पूर्वमन्त्री समेत रहेका नेता रामचन्द्र झाको प्रमुख आतिथ्यमा नगर परिषद सम्पन्न गरिएको हो ।

यस आर्थिक वर्षको लागि ६१ करोड ९० लाख ८० हजार ८९५ रुपैयाँ कुल बजेट अनुमान गरिएको हो । नगरपालिकाका लेखा प्रमुख सँजीव कुमार महतोले बार्षिक आय–व्यय सार्वजनिक गर्दै चालु आर्थिक बर्षको लागि बजेट प्रस्तुतिकरण गरेका थिए ।

२०७६/०७७ को असार मसान्तसम्मको यथार्थ आय ५६ करोड ८० लाख ५१ हजार २७३ रुपैयाँ देखाएको छ भने खर्च भने ३८ करोड ५३ लाख १९ हजार ६९८ रुपैयाँ प्रस्तुत गरिएको छ ।

यसपालीको बजेटमा भौतिक पूर्वाधार विकास, शिक्षा विकास, कृषि तथा सहकारी विकास, सँचार क्षेत्र एवम् पत्रकारिता विकास सहित महिला, बालबालिका तर्फ बजेटलाई प्राथमिकीकरण गरिएको छ ।

नगर परिषद्को क्रममा विभिन्न वडाका वडाध्यक्षहरु, वडा सचिवहरु, वडा सदस्यहरु, कार्यपालिका सदस्यहरु, महिला, युवा, अधिकारकर्मीहरुको सहभागीता रहेको थियो ।

परिषद् सम्पन्न गर्दै निमित्त प्रमुख प्रशासकीय अधिकृत सढानले विगत ५ महिनादेखि नगरभित्रका कर्मचारीहरुले तलबभत्ता नपाएको भन्दै अब अख्तियारी प्रक्रिया पुरा गरे लगत्तै सम्पूर्ण कर्मचारीहरुले तलबभत्ता पाउने जिकिर गरे ।

उनले नगरसभा नहुँदा रोकिएको विकास निर्माणको कार्यक्रमहरु समेत केहीदिनभित्रै सँचालनमा आउने दाबी गरे । उनले नगरसभाकै कारण स्थानीय जनप्रतिनीधिहरुले समेत तलबभत्ता नपाएको भन्दै अब पाउने आसा पलाएको बताए ।

परिषदमा जनता समाजवादी पार्टी समर्थित वडा नं. १ का वडाध्यक्ष राजकुमार यादव, वडा नं. २ का वडाध्यक्ष धनेश्वर यादव, वडा नं. ३ का वडाध्यक्ष विशेश्वर यादव र वडा नम्बर ८ का वडाध्यक्ष राजेश्वर मरिक नगर परिषद्लाई विरोध गरेका थिए भने सोही पार्टीबाट जितेका केही वडासदस्यहरुले भने परिषद्लाई समर्थन गर्दै सहभागिता जनाएको थियो ।

परिषदको क्रममा निमित्त प्रमुख प्रशासकीय अधिकृत बिरेन्द्र कुमार सढान बिशिष्ट अतिथि, नेपाली काँग्रेस नगर अगुवा योगेन्द्र प्रसाद यादव (जोगी), लेखा अधिकृत सँजीव कुमार महतो, प्रशासनका जुगलकिशोर यादव, योजना शाखा प्रमुख शिवराज परियार, प्राविधिक शाखा प्रमुख अनन्त केजरिवाल, प्रधानमन्त्री रोजगारी कार्यक्रम प्रमुख चन्द्रप्रकाश यादव, खानेपानी सरसफाई शाखा प्रमुख ओम नारायण यादव लगायत सम्पूर्ण कर्मचारीहरुको उपस्थिति रहेको थियो ।