धनुषामा २२ सैयाको 'सर्पदंश उपचार केन्द्र' सँचालनमा, फ्रि मै हुने उपचार

न्यूज ब्यूरो, जनकपुरधाम । धनुषामा शुक्रबार २२ सैयाको सर्पदंश उपचार केन्द्रको उदघाटन गरिएको छ ।

धनुषा जिल्लाको क्षिरेश्वरनाथ नगरपालिका वडा नम्बर ५ महेन्द्रनगर बजार स्थ्ति नै निर्माण गरिएको सर्पदंश केन्द्रबाट धनुषा, महोत्तरी, सिरहा लगायत छिमेकी मुलुक भारतका नागरिक पनि निःशुल्क उपचार पाउने भएको छ ।

सर्प दंशका कारणले कतिपयको ज्यान गइरहेको बेलामा २२ शय्याको सर्प दंश उपचार केन्द्र सँचालनमा ल्याएको हो । सर्प दंश उपचार केन्द्रको भवन निर्माण संयुक्त राष्ट्रसङ्घीय विकास कार्यक्रम ( युएनडिपी) ले गरिदिएको छ ।

सर्पदंश उपचार केन्द्रको लागि क्षिरेश्वरनाथ नगरपालिकाले उपकरण तथा सञ्चालनको व्यवस्थापन गरेको मेयर योगेन्द्र पजियारले बताए ।

सर्प दंश उपचार केन्द्रको उद्घाटन गर्दै प्रदेश नंं २ का मुख्यमन्त्री लालबाबु राउतले सर्प दंश उपचार केन्द्रले यस क्षेत्रका जनतालाई अनिकाल मृत्यु हुनबाट जोगाउनका लागि प्रभावकारी उपचार गर्ने विश्वास व्यक्त गरे ।

उनले प्रदेश नंं २ विषालु सर्प बस्ने प्रदेश भएका कारणले प्रदेशमा नै एन्टिभेनम खोपको उत्पादनका लागि प्रदेश सरकार अगाडी बढेको बताए ।

उदघाटन कार्यक्रममा बोल्दै क्षिरेश्वरनाथ नगरपालिकाका प्रमुख योगेन्द्र पंजियारले सर्प दंश उपचार केन्द्रको सञ्चालनका लागि तत्काल १५ लाख तथा वार्षिक रुपमा १० लाख रकम नगरपालिकाले प्रदान गर्ने बताए ।

युएनडिपीको १ करोड २० लाख लगानीमा भवनको निर्माण भएको छ भने उपकरण, शय्यासहितका अन्य व्यवस्थापनमा नगरपालिकाको १ करोड गरेर २ करोड २० लाखको लागतमा सर्प दंश उपचार केन्द्रको निर्माण भएको छ ।

निःशुल्क रुपमा सर्प दंशको उपचार गर्ने नगरपालिकाका प्रमुख योगेन्द्र पंजियारले थपे । साथै सर्प दंशको उपचार नेपाली सेनाको श्रीनाथ गणले खटाएको चिकित्सकसहितको प्राविधिक टोलीले गर्ने भएको छ ।