८ लाख बढीको भन्सार छलीका समान बरामद

न्यूज ब्यूरो, बारा । बारामा ८ लाख ५० हजार बराबरको भन्सार छलीका मालसामान सहित एक जना पक्राउ परेका छन् ।

पक्राउ पर्नेमा पर्सा जिल्लाको वीरगंज महानगरपालिका वडा नं. १ छपकैया बस्ने ३२ वर्षीय रुवि खातुन रहेको प्रहरीले जानकारी दिएको छ । जिल्ला प्रहरी कार्यालय बारा तथा मातहत कार्यालयहरू समेतबाट खटिएको प्रहरी टोलीले प्राप्त सूचनाको आधारमा जिल्लाको विभिन्न स्थानमा भारतबाट भन्सार छली चोरी पैठारी गरी नेपाल भित्राएको अवस्थामा बरामद गरेको हो ।

प्रहरीले ४ लाख ५० हजार बराबरको बिभिन्न किसिमका तयारी तथा थान कपडा, १ लाख ५० हजार बराबरको प्याज र उक्त भन्सार छलीका मालसामान ओसार पसारमा प्रयोग भएको २ लाख ५० हजार बराबरको ४ वटा मोटरसाइकल बरामद गरेको छ ।

तस्करीमा संलग्न रहेकी खातुन र भन्सार छलीका कपडालाई पक्राउ गरी सोमबार भन्सार ऐन अनुसार आवश्यक कारवाहीको लागि भन्सार कार्यालय वीरगंजमा बुझाइएको जिल्ला प्रहरी कार्यालय बाराले जनाएको छ ।