प्रशासनलाई नेता यादवको सुझाव : नेकपाको भविष्य छैन, चाकडी गरेर बद्नाम नहुनोस्

न्यूज ब्यूरो, महोत्तरी । जनता समाजवादी पार्टी (जसपा) नेपालका नेता तथा पूर्वमन्त्री राजकिशोर यादवले प्रशासनलाई कसैको चाकडी गरी बद्नामी हुने कार्य नगर्न सुझाव दिएका छन् ।

महोत्तरीको सदरमुकाम जलेश्वरमा बुधबार आयोजित विरोध प्रदर्शन कार्यक्रमलाई सम्बोधन गर्दै नेता यादवले यस्तो सुझाव दिएका हुन् । उनले प्रशासनलाई निष्पक्ष र स्वतन्त्र ढंगले काम गर्न आग्रह गरे ।

पछिल्लो समय देशका प्रशासनिक निकाय तथा अधिकारीहरुले सत्तासीन दलका मान्छेहरुको इसारामा हिँडेर विपक्षी दलका नेता कार्यकर्तालाई अनावश्यक रुपमा दुःख दिने काम गरिरहेको उनको जिकिर छ । एउटै दल अजम्बरी रुपमा सधैं सत्तामा रहिनरहने भन्दै उनले प्रहरी प्रशासनलाई सच्चिन अनुरोध गरे ।

‘नेकपाको भविष्य छैन, यसरी चाकडी गरेर बद्नाम नहुनुहोस्,’ उनले भने, ‘स्वतन्त्र ढंगले काम गर्नुहोस्, हाम्रो सहयोग रहन्छ ।’ मुलुक र मुलुकका प्रशासनिक निकाय जनताकै करबाट चल्ने भएकाले जनतालाई दुःख दिने काम नगरी जनताको हितमा काम गर्न उनले सुझाव दिए ।

किन प्रदर्शन ?

गत कार्तिक १० गते विजया दशमीको राति दुर्गा पूजाको मूर्ति बिसर्जनको क्रममा जिल्लाको मटिहानी नगरपालिकामा भएको दुई पक्षीय विवादले राजनीतिक रुप लिएको छ । मटिहानी नगरपालिकाको वडा नम्बर ८ मा भएको झडपमा दुबै तर्फका गरी दर्जनभन्दा बढी घाइते भएका थिए ।

एक पक्षले मटिहानी नगरपालिकाका नगरप्रमुख हरिप्रसाद मण्डलको उपस्थितिमा झडप भएको भन्दै आएका छन् भने मेयर पक्षकाले पूर्व निजोजित रुपमा नेकपा पक्षका नेता, कार्यकर्ताहरुले झडप गराई नगरप्रमुखलाई बद्नाम गराउने कोशिश गरिरहेको बताउँदै आएका छन् ।

त्यस मुद्दामा दुबै पक्षबाट मुद्दा दर्ताको प्रयास गरिएको भएपनि नगरप्रमुख पक्षको मुद्दा हालसम्म दर्ता भएको छैन । झडपका क्रममा मेयरसहित जिल्ला समन्वय समितिका सदस्य तथा वडाध्यक्षहरु माथि समेत संघातिक आक्रमण भएको घटनामा संलग्नलाई कारवाहीको साटो स्थानीय प्रशासनले माथिको आदेशमा मेयरलगायतका माथि मुद्दा दर्ता गरेको भन्दै जसपाले विरोध प्रदर्शन गरेको हो ।

प्रदर्शनमा जसपाका नेता राजकिशोर यादवसहित सांसद डा. सुरेन्द्र यादव, प्रदेश २ का समाजिक विकास राज्यमन्त्री अभिराम शर्मा, प्रदेश सांसद रानी शर्मा तिवारी तथा जिल्लाका विभिन्न स्थानीय तहका जसपाबाट निर्वाचित प्रमुखहरुसमेत सहभागी थिए । विरोध प्रदर्शनमा जसपाले मोटो रुपमा नेता कार्यकर्ता उतारेको थियो ।