अपडेटः मोटरसाईकलले ठक्कर दिएर मान्छे मार्ने एक पक्राउ, अर्का धरान रिफर

न्यूज ब्यूरो, जनकपुरधाम । गत आईतबार साँझ धनुषाको कमला नगरपालिका वडा नं. २ माचि झिटकैया स्थित मोटरसाईकलले ठोकेर एक जनाको मृत्यू भएको प्रकरणमा एक जनालाई प्रहरीले पक्राउ गरेको छ ।

पक्राउ पर्नेमा धनुषाको जनकनन्दीनी गाउँपालिका वडा नं. ४ खजुरी बस्ने २२ बर्षिय बसन्त मण्डल रहेको ईलाका प्रहरी कार्यालय खजुरीका प्रहरी नीरिक्षक (ईन्सपेक्टर) हिरेन्द्र रोकायाले जानकारी दिए । उनका अनुसार, घटना भएकै दिन उनलाई उदहा गाउँबाट पक्राउ गरिएको हो ।

कमला नगरपालिका वडा नं. २ माचि झिटकैयामा हुलाकी राजमार्ग (सडक) अन्तर्गत माचि टोल स्थित मोटरसाईकलले ठक्कर दिएपछि स्थानीय ५६ बर्षिय गोपाल यादवको घटनास्थलमै मृत्यू भएको थियो ।

पश्चिमबाट पूर्व तर्फ गईरहेको प्रदेश–२–०२–००१ त ३१२६ नम्बरको मोटरसाईकलले यादवलाई ठक्कर दिएपछि उनको घटनास्थलमै मृत्यू भएको र तुरुन्तै एक्सनमा आएका खजुरी प्रहरीले आरोपित मण्डललाई जनकनन्दीनी गाउँपालिका वडा नं. ५ बाट राती नै नियन्त्रणमा लियो ।

कमला नगरपालिका वडा नं. ३ लगमा बजार स्थित लागेको दुर्गा मेला हेरेर आफ्नो घर तर्फ फर्किरहेको अवस्थामा उनलाई विपरित दिशाबाट ठक्कर दिएको थियो । अत्यधिक गतिमा रहेको मोटरसाईकलले यादवलाई ठक्कर दिएपछि उनको तत्कालै मृत्यू भएको थियो ।

ठक्कर दिने मोटरसाईकलको अगाडीको भाईजरको मोटरसाईकल नम्बर प्लेट फुटेर घटनास्थलमा खसेपछि स्थानीयहले देखेपछि प्रहरीलाई जिम्मा लगाएको थियो । नम्बर प्लेट अनुसार खोज्दै जाँदा सो गाडी धनुषाको बिदेह नगरपालिका वडा नं. ५ मुडिबाको रहेको खुलेपछि अनुसन्धान गर्ने क्रममा मण्डललाई पक्राउ गरेको हो ।

मोटरसाईकलमा पछाडी सबार रहेका अन्दाजी बर्ष ४५ का सुजित मण्डल गम्भिर घाईते भएका हुन् । उनलाई थप उपचारको लागि धरान स्थित विपी कोईराला स्वास्थ्य विज्ञान प्रतिष्ठानमा रिफर गरिएको प्रहरीले जनाएको छ ।