मिर्चैयास्थित पूर्वपश्चिम राजमार्ग जीर्ण, दुर्घटनाको जोखिम बढ्दो

न्यूज ब्यूरो, सिरहा । मिर्चैयास्थित पूर्वपश्चिम राजमार्गमा खाल्डाखुल्डी बनेपछि दुर्घटनाको जोखिम बढेको छ ।

समयमा मर्मत नहुँदा तथा मर्मत भएपनि ठोस काम नहुँदा राजमार्ग जीर्ण बनेको हो । मर्मत सम्भारका लागि सम्बन्धित निकाय गम्भीर नदेखिँदा पहिल्यैदेखि बनेका स–साना खाडल पनि बढेर ठूला बनेका छन् ।

जसका कारण राजमार्गको ठाउँठाउँमा कालोपत्रे उप्किँदा सडक नै जीर्ण बनेको छ । यिनै खोल्डोमा परी दिनहुँजसो सडक दुर्घटना हुने गरेको छ ।

खाल्डाखुल्डीका कारण जिप, टेम्पो, अटो, मोटरसाइकल, कारलगायत सानाठूला सवारी साधन दुर्घटनामा पर्ने क्रम बढेको देखिन्छ । सडकका कारण दुर्घटनाको जोखिम उच्च भएपनि ठाउँठाउँमा निगरानी राख्दै आएकाले गाडी कम गतिमा चल्दा दुर्घटनाबाट जोगिने गरिएको मिर्चैयाका ट्राफिक इन्चार्ज सचिन्द्र यादव बताउँछन् ।

राजमार्गमा बनेको खाल्डोले तीव्र गतिमा चलाइएका सवारी बढी जोखिममा पर्ने गरेको र रातको समयमा झनै बढी जोखिम हुने गरेको उनको भनाइ छ ।

त्यति मात्र नभई सडक जीर्ण बनेका कारण निरन्तर उडिरहने धुवाँ धुलोले पनि यहाँका स्थानीय आजित बनेका छन् । धुवाँ धुलोले यहाँका सर्वसाधारणको स्थास्थ्यमा समेत गम्भीर असर पर्ने गरेको छ ।

तीन दिनभित्र समाधान गर्न माग, नभए सकडमा जाने चेतावनी

राजमार्ग जीर्ण बनेर दुर्घटनाको जोखिम बढेको र व्यापारमा समेत अवरोध पुगेको भन्दै यहाँका अगुवाहरुले तीन दिन भित्र समस्या समाधान गर्न माग गरेका छन् ।

राजमार्गको समस्या समाधानका निम्ति मंगलबार तत्कालिन राजपाका नगरध्यक्ष समेत रहेका अंजय साह, तत्कालिन सपाका नगरध्यक्ष रामदयाल यादव, रामेश्वर यादव, जिमी यादव लगायतका स्थानीय अगुवाहरुले सडक डिभिजन कार्यालय लहानको ध्यानाकर्षण गराउँदै यस्तो माग गरेका हुन् । ‘सडक जीर्ण छ, जोखिमै जोखिम छ,’ अंजय साह भन्छन्, ‘सम्बन्धित निकायको उदासीनता अत्ति भयो ।’

उनीहरुले मिर्चैयाको पश्चिममा साझा संस्था चोकदेखि अन्तिम पूर्वमा बतहा खोलासम्मको राजमार्ग एकदमै नै जीर्ण बनेको भन्दै तत्काल ठोस रुपमा मर्मत सम्भारको काम गरिदिन डिभिजन कार्यालयका प्रमुखलाई बुझाएको पत्रमा उल्लेख छ । तर, राजमार्गको चार लेनको ठेक्का लागिसकेकाले तत्काल कालेपत्रे उप्केको ठाउँलाई मात्रै मर्मत गर्न सकिने सडक डिभिजन कार्यालयले बताएको छ ।

आफूहरुको माग तत्काल ठोस मर्मत सम्भार गराउन भएपनि कुनै किसिमले तत्कालै समस्याको निकास नदिइए सडक अवरुद्ध गर्नसमेत बाध्य हुने अगुवाहरुको चेतावनी छ ।