धरान हस्पिटल जस्तै जनकपुरमा 'मधेश स्वास्थ्य विज्ञान प्रतिष्ठान' बन्ने !

न्यूज ब्यूरो, जनकपुरधाम । मधेश सरकारले प्रदेश नं. १ को धरानमा रहेको विपी कोईराला स्वास्थ्य विज्ञान प्रतिष्ठान जस्तै जनकपुरमा पनि मधेश स्वास्थ्य विज्ञान प्रतिष्ठान बनाउने भएको छ ।

आईतबारको प्रदेश सभा बैठकबाट मधेश स्वास्थ्य विज्ञान प्रतिष्ठान गठन सम्बन्धी विद्येयक सर्व सहमतिले पारित गरिएपछि जनकपुरको प्रादेशिक अस्पताललाई नै विस्तार गरी सो अवधारणा लागू गर्ने भएको छ ।

हालको प्रादेशिक अस्पताल जनकपुरधामलाई यस मधेश स्वास्थय विज्ञान प्रतिष्ठान अन्तरगत राखी धरानको विपी कोइराला स्वास्थ्य बिज्ञान प्रतिष्ठान र पाटन स्वास्थ्य बिज्ञान प्रतिष्ठानको जस्तै अबधारणामा प्रदेश सरकारले मधेस स्वास्थ्य बिज्ञान प्रतिष्ठान, जनकपुरधामको गठन गरेको छ ।

प्रदेश नं. २ का सामाजिक विकास मन्त्री नबल किशोर साहको विशेष पहलमा ल्याइएको प्रस्तावमा प्रदेशका साँसदहरुले सर्व सहमति जनाएपछि अब मधेश स्वास्थ्य विज्ञान प्रतिष्ठान बन्ने भएको छ ।

जटिल प्रकृतिको रोग उपचारको लागि करिब अढाई सय किलोमिटरको दुरीमा रहेको धरान जानुपर्ने बाध्यता निरुत्साहित हुने बताईएको छ । धरान जस्तै उपचारको सुविधा जनकपुरमै उपलब्ध हुने जनाइएको छ ।