विद्यालयमा राजनीतिक विवाद : भवन निर्माण नहुँदै ट्रस तोडफोड

न्यूज ब्यूरो, सिरहा । सिरहाको मिर्चैया नगरपालिका–३ राघोपुर बजारस्थित रहेको आधारभुत विद्यालयमा भवन निर्माण गर्न खडा गरिएको ट्रस अज्ञात व्यक्तिहरुको समूहले तोडफोड गरेका छन् ।

विद्यालयमा परिसरमा निर्माण गर्न लागिएको नयाँ भवनको काम सुरु भएको दुइ दिन नबित्दै गएराति अज्ञात समूहले तोडफोड गरेका हुन् । शिक्षा मन्त्रालयको सशर्त बजेट अन्तर्गत सोह्र लाखको लागतमा विद्यालयमा दुइ कोठे भवन निर्माण गरिँदै थियो ।

जीर्ण विद्यालयको भौतिक विकास देख्न नसक्नेहरुले रातीको समयमा ट्रस तोडफोड गरेको विद्यालय व्यवस्थापन समितिका अध्यक्ष रामकुमार यादवले बताए । भवन निर्माण गर्न खडा गरिएको ट्रस तथा जोडिएको इटा स्थानीय खगेश्वर यादव तथा तिनको पक्षका व्यक्तिहरुले रातीको समयमा तोडफोड गरेको उनको आरोप छ ।

विद्यालयमा तोडफोड हुँदा त्रासले पठनपाठनसमेत अवरुद्ध भएको विद्यालयका प्रअ देवशंकर यादवले बताए ।

तोडफोडको कुरा आउँदा निर्माणको गति, अवस्था तथा विद्यालयमा विगतमा हुने गरेको राजनीतिक चपेटका कुराबारे अध्ययन गर्नुपर्ने स्थानीयहरु बताउँछन् । गएको दुई वर्षअघि विद्यालयमा अध्ययनरत विद्यार्थीहरुको अभिभावकहरुको सहमतिमा स्थानीय खगेश्वर यादवलाई विद्यालय व्यवस्थापन समितिको अध्यक्षमा चयन गरिएको थियो ।

आफ्नो अनूकुलको अध्यक्ष नभएको सोच राखेर मिर्चैया नगरपालिकाका मेयर श्रवणले आफ्ना नजिकका व्यक्तिहरुको रोहवरमा रामकुमारलाई विद्यालय व्यवस्थापन समितिको अध्यक्ष बनाएको स्थानीय बताउँछन् । दुई अध्यक्ष मध्ये को हो अध्यक्ष त्यसको बैधानिकताका लागि मुद्दा चल्दैछ ।

मिर्चैया नगरपालिकाले सम्पन्न गरेको कार्य विवरणको प्रगति तथा खर्चको हिसाव माग गर्दा आफ्नो राजनीतिक पहिचान चौपट गर्न प्रपंचको रुपमा मेयर पक्षका व्यक्तिहरुले विद्यालयको ट्रस तोडफोड गरेको खगेश्वरको आरोप छ । ‘सुशासन कायम गर्न थालिएको आन्दोलनमा मेरो भुमिकाबाट चकित भएर कुनै मुद्दामा मलाई फसाउन खोजिदैछ,’ खगेश्वरले भने, ‘चार दिनअघि मेयर पक्षका व्यक्तिले भनेका थिए अब केही दिन भित्र प्रहरीले तिमिहरुलाई पक्राउ गर्छ । त्यो भनेको केही दिन नबित्दै विद्यालयमा घटना गराएर बदनाम गराएर राजनीतिक पहिचानमा असर पर्ने गरी मेरो नाम जोड्दै छन् ।’ विद्यालयमा भएको ट्रस तोडफोडको घटनामा आफ्नो कुनै भूमिका नरहेको उनको भनाइ छ ।

पारदर्शीता, सुशासन र जनपक्षीय काम गर्न दवाब सृजना हुने गरी हुँदै आएको मिर्चैया नगरपालिका लक्षित आन्दोलनका गतिविधिमा खगेश्वरले अग्र स्थानमा रहेर भुमिका निर्वाह गर्दै आएका छन् । खगेश्वर र मेयर श्रवणको राजनीतिक विवाद वर्षदेखि नै हुँदै आएको स्थानीयहरुले बताए ।

यता, ग्रामिण विकास देख्न नसक्नेहरुले गएको केही वर्षदेखि अपराधिक गतिविधि गर्दै गाउँले, वडा समिति र विद्यालयलाई दुःख दिने काम गर्दै आएको मिर्चैया नगरपालिकाका मेयर श्रवण यादवले बताएका छन् । उनले यस घटना सम्बन्धमा छानविन भइरहेको र दोषीलाई कारवाही गरिने बताए ।