जनकपुरः माछा मार्ने विषयमा झडप, तीन जना घाईते !

न्यूज ब्यूरो, जनकपुरधाम । धनुषामा माछा मार्ने विषयमा दुई पक्षबीच झडप हुँदा तीन जना घाईते भएका छन् ।

धनुषाको सबैला नगरपालिका वडा नं. १३ स्थित माछा मार्ने बिषयमा भनाभन हुँदै केही बेरमा उग्र रुप लिएपछि झडप भएको जिल्ला प्रहरी कार्यालय धनुषाले जनाएको छ । झडपमा तीन जनाको टाउकोमा चोट लागेको जनाइएको छ ।

सबैला नगरपालिकाको वडा नं. ४ र वडा नं. १३ को बीचमा रहेको कुलो (पैनी) मा माछा फँसाउन लगाएको चचरी (कोईना) मा फँसेको माछा स्थानीय एक जनाले चोरेपछि झगडा हुन गएको प्रहरीको भनाई छ ।

समान्य झगडा झडपमा परिणत भएपछि सबैला नगरपालिका वडा नं. १३ बस्ने सजन पासवान, वडा नं. ४ बस्ने सँजीव यादव र वडा नं. १३ कै जीवछ पासवान गरी ३ जना घाईते भएको हो । सो घटनामा सजन पासवानको अवस्था गम्भिर रहेको प्रहरीले जनाएको छ ।

सबैला ४ बस्ने स्थानीय भुलुर कुमरले माछा फँसाउन लगाएको चचरीबाट जीवछका आफन्तजनले माछा चोरेपछि उनलाई चचरी मालिक भुलुरले कुटपिट गरेका थिए । त्यसपछि गाउँ गएर आफूलाई कुटपिट गरेको भनेपछि समूहमा आएका आफन्तजन र भुलुरको परिवारबीच झडप भएको थियो ।

जीवछ र सँजीवलाई स्थानीय स्तरमा उपचारपछि घर फर्काइएको छ भने सजन पासवानलाई गम्भिर चोट लागेको कारण थप उपचारको लागि शुक्रबार राती नै प्रादेशिक अस्पताल जनकपुर ल्याएको स्थानीय मनोज पासवानले जानकारी दिए ।