संविधानको विरोधमा सिरहाका विभिन्न ठाउँमा प्रदर्शन

न्यूज ब्यूरो, सिरहा । संविधान दिवसको विरोधमा सिरहाको विभिन्न स्थानमा प्रदर्शन भएको छ ।

जनता समाजवादी पार्टीले जिल्लाको मिर्चैया, गोलबजार, लहान, सिरहा, कल्याणपुर सहितका विभिन्न स्थानमा प्रदर्शन गरेको हो ।

कालो ब्यानरसहित कालो कपडा शीरमा बाँधेर प्रदर्शनकारीहरुले संविधान जारी भएको दिन असोज ३ गतेलाई कालो दिनको संज्ञा दिँदै विरोध प्रदर्शन गरेका हुन् ।

जिल्लाको विभिन्न ठाउँमा भएको प्रदर्शन पश्चात् कोणसभा गरि कार्यक्रम समापन गरिएको थियो । जसपाको विरोध प्रदर्शनमा र्‍याली शान्तिपूर्ण भए पनि सुरक्षा व्‍यवस्था भने कडा गरिएको थियो ।

मिर्चैयामा विरोध प्रदर्शनपछि भएको कोणसभामा वक्ताहरुले संविधान संशोधन नभएसम्म आसोज ३ गते मधेशमा कालो दिनकै रुपमा संविधानको विरोध गर्ने बताए ।

अहिले राष्ट्रमा एकल पहिचानको आधारमा राष्ट्रियताको परिभाषित गरिएकाले जबसम्म सम्पूर्ण जाति, समुदाय, धर्मको आधारमा राष्ट्रियता परिभाषित हुँदैन, तबसम्म आन्दोलन जारी रहने उनीहरूको चेतावनी छ ।

संविधानको विरोधमा आज साँझ ७ बजे १० मिनेटसम्म ‘ब्ल्याक आउट’ गर्नेसमेत आग्रह गरिएको छ ।