धनुषाको मिथिला बिहारी नपाको बजेट ६१ करोड

न्यूज ब्यूरो, जनकपुरधाम । धनुषाको मिथिला बिहारी नगरपालिकाको यस आर्थिक वर्षको बजेट लगभग ६१ करोड विनियोजन गरिएको छ ।

नगरपालिकाको सम्पन्न पाँचौ नगरसभाबाट ६० करोड ९९ लाख १८ हजार रुपैैयाँ आर्थिक वर्ष २०७७÷७८ को लागि बजेट विनियोजन गरिएको हो ।

नगरपालिकाका नगर प्रमुख अनिल कुमार यादवको अध्यक्षता तथा प्रमुख प्रशासकीय अधिकृत बीरेन्द्र लाल कर्णको विशेष उपस्थितिमा सम्पन्न भएको पाँचौ नगरसभाबाट किसानलाई राहत प्रदान गरिएको छ भने शिक्षा र स्वास्थ्यलाई प्राथमिकतामा राखिएको छ ।

नगरपालिका भित्रका युवाहरुको स्वरोजगारी तर्फ विशेष ध्यान दिएको बताउँदै नगर प्रमुख अनिल कुमार यादवले कृषकहरुको लागि विशेष व्यवस्था चालु आर्थिक बर्षमा गरिएको बताए । उनले लकडाउन र निषेधाज्ञाका कारण शिक्षा क्षेत्रमा परेको प्रभावलाई समान्य बनाउन शिक्षालाई प्राथमिकतामा राखिएको बताए ।

गत भदौ १६ गतेदेखि नै सुरु भएको पाँचौ नगरभा शनिबार विधिवत रुपमा सम्पन्न भएको हो । नगर उप प्रमुख (उपमेयर) विरामी भएको कारण आजको सभाबाट छोटो समयमै फर्किएको जनाउँदै चालु आर्थिक वर्षमा सभाबाट चालु बजेट ८ करोड ७० लाख रुपैयाँको प्रस्तुतिकरण गरिएको हो ।

यस्तै, नगर स्तरीय पूर्वाधार विकास कार्यक्रमको लागि ६ करोड १५ लाख ५० हजार, पुँजीगत बजेटतर्फ १ करोड २० लाख, वडा स्तरीय बजेट तर्फ ९ करोड ५० लाख विनियोजन गरिएको हो । प्रत्येक वडामा भने ९५ लाख रुपैयाँ विनियोजन गरिएको जनाइएको छ ।

समाजिक सुरक्षा भत्ता तर्फ ८ करोड, शिक्षा तर्फ १० लाख, पशु तर्फ ८ लाख, महिला विकास तर्फ ३ लाख, कृषि तर्फ ५ लाख, सशर्त योजना १४ करोड ८५ लाख छुटयाइएको बताईएको छ ।

गत आर्थिक वर्षको भुक्तानी रहेको बाँकी १२ करोड ६६ लाख ६८ हजार रुपैयाँ सहित बहुक्षेत्रिय पोषण कार्यक्रमको लागि १४ लाख ८ हजार विनियोजन गरिएको जनाइएको छ ।