धनुषा साईन्स क्याम्पसका 'डा. राम स्वार्थ राय' लाई १९ लाख हिनामिना गरेको भन्दै स्पष्टिकरण माग

न्यूज ब्यूरो, जनकपुरधाम । जनकपुरको धनुषा साईन्स क्याम्पस सँचालक समितिका सदस्य सचिव प्राध्यापक डा. राम स्वार्थ रायसहित समितिका २ जनासँग स्पष्टिकरण माग गरिएको छ ।

धनुषा साईन्स क्याम्पस सँचालक समितिकी अध्यक्ष हिमालय शाहले सदस्य सचिव रहेको बेला डा. रायले क्याम्पसको खाताबाट १९ लाख रुपैयाँको हिनामिना गरेको आरोप लगाउँदै उनी सहित अन्य १ जनालाई स्पष्टिकरण सोधिएको हो ।

क्याम्पसको अडिट रिपोर्ट अनुसार डा. रायले क्याम्पसको खाताबाट १९ लाख रुपैयाँको गम्भिर प्रकृतिको आर्थिक अपचलन गरेको भन्दै ठगी समेतमा कारवाही किन नगर्ने भनेर स्पष्टिकरण सोधिएको हो । सोही सन्दर्भमा सँचालक समितिका सदस्य विनोद कुमार साहलाई समेत स्पष्टिकरण सोधिएको हो ।

डा. रायलाई कानुन र नियम विपरित गैर कानुनी तरिकाले १९ लाख रुपैयाँ बैँकबाट झिक्नको लागि चेकमा दस्तखत गरी रकम झिकेर दिएको भन्दै स्पष्तिकरण सोधिएको हो । डा. रायको दुई बर्षे कार्यकाल समाप्त भईसकेको अवस्थामा पनि सदस्य सचिवको हैसितमा राखेर क्याम्पसको १९ लाख रुपैयाँ पेश्की भनेर लिएको अडिट रिपोर्टमा देखाइएको बताईएको छ ।

स्पष्टिकरण सोधिएको पत्रमा भनिएको छ–“यस धनुषा साईन्स क्याम्पसलाई विधिवत्‌ सञ्चालन गर्नका लागि २०६३ सालमा उच्च माध्यमिक शिक्षा परिषद्‌ बाट स्वीकृत नियमावलीको नियम ७ को उपनियम (२) बमोजिम सदस्य(सचिवको २ वर्षे पदावधि समाप्त भई सकेपछि पनि नियम ५ को उपनियम (४) र नियम ७ को उपनियम (३) को देहाय (क) को व्यवस्थाको प्रतिकूल हुने गरी सञ्चालक अध्यक्षलाई अनुपस्थित देखाई तपाईले आफूलाई सदस्य(सचिवको हैसियतमा क्याम्पसको बैठक तथा काम कारवाही गर्दै अनियमित रुपमा क्याम्पस सञ्चालन गर्दै आएनु भएको र तपाई र सञ्चालक सदस्य विनोद कुमार साहको संयुक्त दस्तखत्‌ बाट सञ्चालन भएको क्याम्पसको बैंक खाताबाट तपाई राम स्वार्थ रायले आ.व. ०७२/०७३ मा रु. १९,००,००० (उन्नाइस लाख लाख) पेश्की भनेर लिएको कुरा सिए पारसमणी भण्डारीको लेखा अध्ययन प्रतिवेदनबाट देखिएको हुँदा यो स्पष्टिकरण सोधिएको छ ।”

धनुषा साईन्स क्याम्पसको नियमावली २०६३ को नियम ७ को उपनियम (२) बमोजिम सदस्य सचिवको २ वर्षे पदावधि समाप्त भई सकेपछि पनि सदस्य सचिवको हैसियतमा काम गर्नुको कारण र नियम ५ को उपनियम (४) र नियम ७ को उपनियम (३) को देहाय (क) को विपरित हुने गरी सञ्चालक समितिको बैठक राखि गलत तथा गैरकानुनी निर्णयहरु गर्नुको कारण स्पष्ट गर्दै क्याम्पसको खाताबाट रु. १९,००,००० (उन्नाइस लाख) लिएको विषय गम्भिर प्रकृतिको आर्थिक अपचलन भएको ठहर गरिएको छ ।

सोही आरोपमा क्याम्पसको रकम गैरकानूनी रुपमा प्रयोग गरे उपर प्रचलित कानून बमोजिम ठगी समेतमा कारवाही किन गर्नु नपर्ने हो सो समेत स्पष्ट गरी ७ दिन भित्र स–प्रमाण सहित पेश गर्न भन्दै स्पष्टिकरण सोधिएको छ ।

यसका साथै, सँचालक अध्यक्ष शाहले कारवाहीको लागि जिल्ला प्रशासन कार्यालय धनुषामा ठगी गरेको भन्दै उजुरी समेत दिएकी हुन् । उनका अधिवक्ताले रकम हिनामिना गरी ठगी गरेको आरोप सहित जिप्रका धनुषामा उजुरी हालिएको बताए ।

यता, जिल्ला प्रशासन कार्यालय धनुषाले भने दुवै पक्षलाई बोलाएर उजुरी उपर कारवाही हुने जनाएको छ । जिप्रका धनुषाका गणपति झाले न्यूज ब्यूरोसँग कुराकानी गर्दै उजुरी निवेदन हालिएको भन्दै सिडिओको आदेशमा कारवाही प्रक्रिया अघि बढाइने जनाइएको छ ।

प्राध्यापक डा. राम स्वार्थ रायमाथि १९ लाख रुपैयाँको हिनामिना गरेको आरोप सहित ठगी गरेको भन्दै मुद्दा हाल्ने तयारी गरेको सँचालक हिमालय शाहले बताईन् ।