मन्दिरका पूजारीलाई कन्चटमा गोली हान्ने पटेलद्धय सार्वजनिक

न्यूज ब्यूरो, रौतहट । रौतहटको हनुमान मन्दिरका पूजारी हत्या प्रकरणमा सँलग्न रहेका दुई जनालाई प्रहरीले आज (बुधबार) सार्वजनिक गरेको छ ।

रौतहट जिल्लाको माधव नगरपालिका वडा नं. २ खेस्रैया चोक स्थित रहेको हनुमान मन्दिरको पूजारी बर्ष ६५ का श्रीराम साहलाई गत भदौ ३ गते राती कन्चटमा गोली हानी हत्या गरेको थियो ।

कन्चटमा गोली हानी हत्या गरेको आरोपमा रौतहटको देवाही गोनाही नगरपालिका वडा नं. १ करुनिया बस्ने वर्ष ३६ को नरेश भन्ने राम नरेश राउत पटेल तथा सोही ठाउँ बस्न्ने वर्ष २८ को बाल कुमार पटेललाई सार्वजनिक गरिएको छ ।

पटेलद्धय लगायत केहि अन्य व्यक्तिहरु पनि पुजारीको हत्यामा संलग्न रहेको भन्ने अनुसन्धानको शिलशिलामा खुल्न आएको जनाइएको छ । पक्राउ परेका राम नरेश राउत पटेल र बाल कुमार पटेललाई २ नं. प्रदेश प्रहरी कार्यालय जनकपुर र जिल्ला प्रहरी कार्यालय रौतहटबाट खटिएको विशेष प्रहरी टोलीले बौधिमाई नगरपालिका वडा नं. ७ वडकी बंकुल एरियाबाट पक्राउ गरिएको जनाइएको छ ।

आज (बुधबार) उनीहरुलाई पक्राउ गरि अनुसन्धान गर्दा प्रारम्भिक अनुसन्धानबाट राम नरेश पटेलले कटुवा पेस्तोल प्रयोग गरी हत्या गरेको र बालकुमार पटेल घटना स्थित नजिक रहि मानिसको आवत जावतलाई निगरानी गरेको भनि उनीहरुले अपराध स्विकार गरेको भन्ने प्रारम्भिक अनुसन्धानबाट खुल्न आएको प्रहरीले जनाएको छ ।

प्रदेश प्रहरीले जनाए अनुसार, राम नरेश पटेलको बुवाले पुजारीसँग रकम ब्याजमा लिएको र रकम तिर्ने क्रममा विवाद भएको कारणले हत्या गरेको खुलाइएको छ । यसका साथै, मृतक पुजारीको मन्दिर नजिक ३ वटा रक्सी पसल रहेको र रक्सी सेवन पश्चात मन्दिरको धारामा आई खुट्टा धुने, पानी खाने र घटना हुनु भन्दा ३ दिन अघि राम नरेश पटेल र पुजारी बिच बिवाद भएको कारण पनि आशंका गरिएको छ ।

गाउँमा विभिन्न विषयहरुमा छलफल हुँदा मृतक पुजारीले फरक मत राख्ने क्रममा पुजारी र राम नरेश पटेल लगायत अन्य सँग धेरै पल्ट वादविवाद भएको हुन सक्ने जनाइएको छ ।

घटनामा संलग्न अन्य फरार रहेको अपराधिको खोजी भई रहेको प्रहरीले जनाएको छ । पक्राउ परेको अभियुक्तहरुलाई जिल्ला अदालत गौर बाट १० दिनको म्याद थप भई अनुसन्धान शुरु गरिएको जनाइएको छ ।