अब गुणस्तरहीन काम गर्नेलाई त्यतिकै छाडिन्न : सिडिओ कणेल

न्यूज ब्यूरो, सिरहा । सिरहाका प्रमुख जिल्ला अधिकारी (सिडिआ) प्रदीपराज कणेलले जनहितका योजनाहरुमा गुणस्तरीयहिन कार्य गर्नेहरुलाई अब त्यतिकै नछाडिने बताएका छन् ।

स्थानीयहरुले अवरुद्ध पारेको विकास निर्माणको काम पुनः सुचारु गराएका सिडिओ कणेलले सार्वजनिक हितको योजनाहरुमा गुणस्तरीयहिन काम गर्ने जो कोहीलाई कानुनको दायरामा ल्याएर कारवाही गर्ने बताएका छन् ।

विष्णुपुर गाउँपालिका–४ थल्हामा भइरहेको विकास निर्माणको काम सिरहाका सिडिओ कणेलले पुनः सूचारु गराएका हुन् । स्थानीयहरुले गुणस्तरहीन काम भइरहेको भन्दै काम अवरुद्ध पारेका थिए ।

स्थानीयहरु कामप्रति सन्तुष्ट नरहेको र काम अवरुद्ध पारिएको जानकारी पाएपछि सिडिओ कणेल मंगलबार ग्राउन्ड जिरोमा पुगेका थिए । सुरक्षा अधिकारीसहित पुगेका उनले काम गरिरहेका ठेकेदार र साइट इन्जिनियरलाई स्थानीयको चाहना र मापदण्ड अनुसार काम गर्न निर्देशन दिए ।

सिडिओ कणेलले मापदण्ड विपरीत काम भए कारवाहीको भागिदार हुनुपर्ने चेतावनी दिँदै गुणस्तरीय र लापरबाही नगरी छिटो काम गर्न निर्देश गरे ।

उनले अनुगमन गरेर ठेकेदारलाई यस्तो निर्देशन दिएपछि स्थानीयले काम सूचारु गर्न दिएको स्थानीय युवा नवीन यादवले बताए ।