सिरहा: गोलबजार नगरपालिकाले दिएन कोरोनाको नाममा खर्च भएको हिसाब

न्यूज ब्यूरो, सिरहा । सिरहाको गोलबजार नगरपालिकाले कोरोना नियन्त्रणमा गरिएको खर्चको विवरण नदिएपछि युवाहरुले आन्दोलनको चेतावनी दिएको छ ।

स्थानीय अगुवा युवाहरुले सूचनाको हक प्रयोग गरी नगरपालिकाले अहिलेसम्म कोरोना नियन्त्रणको विभिन्न शिर्षकमा भएको खर्चको बारेमा हर हिसाब पारदर्शी गर्न निवेदन दर्ता गराएका हुन् ।

स्थानीय राम कुमार यादव, सत्रुधन यादव र गुरुशरण सिँहले सँयुक्त रुपमा सूचनाको हक प्रयोग गरी कोरोना नियन्त्रणको लागि कुन कुन शिर्षकमा के कति खर्च भएको बारे सूचना उपलब्ध गराउन गत साउन २८ गतेमा निवेदन दर्ता गराएका हुन् ।

कम्तीमा ७ र बढीमा १५ दिनभित्र सार्वजनिक सूचना उपलब्ध गराउनुपर्ने प्रावधान रहेपनि नगरपालिकाको कार्यालयले अझै हर हिसाबको विवरण उपलब्ध नगराएको भन्दै उनीहरुले आन्दोलनको विकल्प नरहेको बताएका छन् ।

उनीहरुले सूचना उपलब्ध नगराए आन्दोलन सहित अदालतसम्म जाने तथा सम्बन्धित निकाय समेतमा जाने चेतावनी दिएको छ । विभिन्न स्थानीय तहहरुले कोरोना नियन्त्रणको नाममा लाखौं करोडौंको अनियमितता गरेको समाचारहरु बाहिर आएको छ ।