विकल्प नखोजे अब व्यापारीहरु निषेधाज्ञा तोडन बाध्य हुनेछ : महासचिव महासेठ

न्यूज ब्यूरो, जनकपुरधाम । जनकपुर उद्योग वाणिज्य सँघका महासचिव जीतेन्द्र महासेठले प्रशासनले निषेधाज्ञाको अर्को विकल्प नखोजे व्यापारीहरु निषेधाज्ञाको अवज्ञा गर्न बाध्य हुने बताएका छन् ।

आज (शुक्रबार) जनकपुरमा एक व्यापारीलाई प्रहरीले कुटपिट गरेको तथा केही व्यापारीले मोटरसाईकल जुलुस समेत निकालेको सन्दर्भमा कुराकानी गर्दै महासचिव महासेठले यहाँका व्यापारीहरु पनि निरन्तर निषेधाज्ञाले आजित भईसकेको भन्दै विकल्प खोज्न सुझाएका छन् ।

स्थानीय प्रशासनले जनकपुरका व्यापारीहरुलाई विहानदेखि कम्तीमा ३ बजे दिउँसोसम्म पसल सँचालन गर्न दिनुपर्ने प्रस्ताव महासँघको तर्फबाट राखेको जनाउँदै प्रशासनले अस्वीकार गरी निषेधाज्ञाका साथै व्यापारीलाई पनि पसलहरु खोल्न नदिएको आरोप लगाएका छन् ।

चर्को घर भाडा, परिवार पाल्ने तनावले गर्दा यहाँका व्यापारीहरुको अवस्था झन बिग्रदै गएको भन्दै समयको सिन्डीकेट गरेर भएपनि व्यापारीलाई सहजता प्रदानको अब अन्तिम विकल्प यही रहेको बताए । उनले समय मिलाएर अब जनकपुरको पसलहरु सँचालन गर्न दिनुपर्ने माग राखे ।

उनले सुरक्षाको सम्पूर्ण तयारीका साथ, पूर्ण सुरक्षा विधि अपनाएर पसले तथा ग्राहकमा लागू गरी पसल सँचालन गर्न दिन माग उठाएका छन् । यसको लागि गृहकार्य भईरहेको तथा यसको लागि सम्बन्धित निकायमा ध्यानकर्षण गराउने कार्य उपर समेत छलफल जारी रहेको बताए ।

व्यापारीहरुको मोटरसाईकल जुलुसको सन्दर्भमा उनले आफूहरु व्यापारी कुटपिट र पक्राउ प्रकरणमा जिल्ला प्रहरीमा भएको बेला लगाएको हुन सक्ने बताएका छन् । यस उपर पनि उनले उनीहरु निरन्तर निषेधाज्ञाले आजित भएर नारावाजी गरेको हुन सक्ने बताए ।

सोही क्रममा मोटरसाईकल जुलुसमा सहभागी रत्ना ट्रेडर्सका सँचालक रतन कुमार चौधरीले ऋण, कर्जा र घरबेटीको दबाबमा परेका व्यापारीलाई पनि प्रहरीले उल्टै कुटपिट गरेको विरोधमा प्रहरी विरुद्ध नारावाजी गरेको बताएका छन् ।

उनले जनकपुरका केही पसलेहरु मिलेर मोटरसाईकल जुलुस निकालेको बताएका छन् ।