सिरहामा २१० बेडको आइसोलेसन सञ्चालनमा ल्याइने

न्यूज ब्यूरो, सिरहा । समुदाय स्तरमा कोरोना फैलिएको तथा सँक्रमितलाई राख्नको लागि हम्मे परेको बेला सिरहामा २ सय १० बेडको आईसोलशन सँचालन ल्याउने भएको छ ।

संकट व्यवस्थापन केन्द्र सिरहाले जिल्लाभित्रको सबै स्थानीय तहसँगको समन्वयमा जिल्लाको ५ ठाउँमा २ सय १० बेडको आइसोलेसन सञ्चालन गर्ने भएको छ ।

सिरहाका प्रमुख जिल्ला अधिकारी तथा केन्द्रका संयोजक प्रदीपराज कँडेलको विशेष पहलमा सिरहा, मिर्चैया, चोहर्वा, गोलबजार र लहानमा आइसोलेसन सञ्चालन गर्ने गरी स्थानीय तहका प्रमुखहरूसँग स्थलगत अनुगमनसँगै छलफल गरिसकेको छ ।

‘कोरोना संक्रमितका लागि जिल्लाको सिरहा सदरमुकाम र धनगढीमाईको छपराढीमा सञ्चालित आइसोलेसनको क्षमताले नभ्याउने देखियो,’ कँडेलले भने, ‘तत्काल आइसोलेसनको व्यवस्थापन गरी सञ्चालन नगरे स्थिति भयावह हुन सक्ने सम्भावनालाई मध्यनजर गर्दै बेड थप गर्न लागिएको हो ।’

मिर्चैयास्थित प्राथमिक स्वास्थ्य केन्द्रमा ३०, गोलबजार– ९ स्थित माविमा ३०, लहानमा ५०, चोहर्वा रेडक्रस भवनमा एक सय बेडको आइसोलेसन तत्काल सञ्चालन गर्ने गरी काम भइरहेको कँडेलले बताए ।

‘आइसोलेसन सञ्चालनपूर्वको सरसफाइ, खानेपानी, बिजुली, शौचालयसहितको व्यवस्थापन स्थानीय तहले गर्नेछन्,’ उनले भने, ‘जिल्ला सदरमुकाम सिरहास्थित सूर्यनारायण सत्यनारायण मोरबैता यादव बहुमुखी क्याम्पसको खाली रहेको छात्रावास भवनमा पनि आइसोलेसन सञ्चालन गर्नेगरी तयारी हुँदै छ ।’

कोरोना परीक्षणको दर र दायरा बढाएपछि संक्रमितको संख्या बढेको उल्लेख गर्दै उनले नियन्त्रण र रोकथामका गर्न विद्यमान जटिल परिस्थितिलाई सबैले मनन गरी आ–आफ्नो दायित्व पूरा गर्नुपर्ने बताए ।