बजार लगाउने विषयमा कुटाकुट, एक युवक गम्भीर घाइते

न्यूज ब्यूरो, सिरहा । सिरहाको मिर्चैया नगरपालिका-१२ मा बजार लगाउने विषयमा कुटाकुट भएको छ ।

मिर्चैया-१२ सिक्रौनस्थित नहरमा लाग्दै आएको बजारको विषयमा विवाद भएको हो । विवादमा भनाभनपछि कुटाकुट हुँदा एकजना गम्भीर घाइते भएका छन् ।

शुक्रबार बिहानै स्थानीय जयकिशोर कापर र सोही ठाउँका दिपनारायण कापर (डम्बर) बीच भएको कुटाकुटमा जयकिशोरलाई गम्भीर चोट लागेको हो । दिपनारायणले काठको चिर्पटले हान्दा जयकिशोरको टाउको फुटेको छ ।

उनको मिर्चैयास्थित एक हस्पिटलमा उपचार भइरहेको छ भने टाउकोमा १८ वटा टाका लगाइएको छ ।

के हो विवाद ?

सिक्रौनको नहरमा विगत करीब १ वर्षदेखि बजार लाग्दै आएको छ । स्थानीयहरुले त्यसताका हरेक सोमबार र शुक्रबार बजार लगाउने निर्णय गर्दै बजार लगाउँदै आएका थिए ।

तर, पछिल्लो समय डम्बरसहित केहि व्यक्तिले शुक्रबारको बजार बिहीबार लगाउने अडान लिँदै आएका थिए । तर, अधिकांशले बिहीबार मिर्चैया बजार पर्ने भएकाले शुक्रबार नै ठीक रहेको भन्दै पहिला झैँ बजार लागिरहनु पर्ने भन्दै आएका थिए ।

स्थानीयका अनुसार, डम्बर शुक्रबार बिहान बजार लाग्ने ठाउँमा गएर बिहीबार नै बजार लगाउने, रोक्नेले रोकेर देखाओस् भन्दै अश्लील शब्द प्रयोग गरिरहेको देखेपछि जयकिशोरले किन गाली गरेको भन्दा दुबैबीच भनाभन भएको थियो । त्यसपछि कुटाकुट भएको हो ।

जयकिशोर बजार थालनी गर्ने मध्येका एक हुन् । यता, डम्बरलाई मिर्चैया प्रहरीले पक्राउ गरेको छ ।