अब एक जिल्लाबाट अर्को जिल्ला जान नपाइने, सबै सवारी पास बन्द !

न्यूज ब्यूरो, जनकपुरधाम । नेपाल सरकारको गृह मन्त्रालयले सबै प्रकारको सबारी पास बन्द गरेको छ । एक सूचना जारी गर्दै एक जिल्लाबाट अर्को जिल्लासम्मको लागि दिँदै आएकोमा अब कुनै पनि प्रकारको सवारी पास वितरण नगर्न आग्रह गरेको छ ।

भोली (बिहिबार) देखि लागू हुने गरी सम्बन्धित जिल्ला प्रशासन कार्यालयबाट वितरण हुँदै आएको सवारी पास उपलब्ध नगराउन निर्देशन दिएको हो । ७७ वटै जिल्ला प्रशासनलाई गृह मन्त्रालयले सो निर्देशन दिएको हो ।

गृहमन्त्रालयद्वारा सबै जिल्ला प्रशासनलाई दिइएको निर्देशनमा भनिएको छ ‘कोभिड १९ को जोखिमलाई मध्यनजर गर्दै अर्को व्यवस्था नहुन्जेलसम्मका लागि सवारी पास वितरण नगर्न, नगराउनुहुन आदेशअनुसार अनुरोध छ।’

अब एक जिल्लाबाट अर्को जिल्लामा सवारी लिएर जान नपाइने भएको छ। पछिल्लो समय कोरोनाभाइरसको संक्रमण बढ्दै जाँदा सरकारले सवारी सञ्चालन तथा आवतजावतमा कडाई गरेको हो।

यसअघि लकडाउनको अवस्थामा तथा निषेधाज्ञा भएको अवस्थामा जिल्ला प्रशासन कार्यालयमा सवारी पास लिएर आवतजावत गरिदै थियो । अबदेखि सो पनि बन्द गरिएको छ ।