भारतले दिए नेपाली सेनालाई १० आइसियु भेन्टिलेटर

न्यूज ब्यूरो, काठमान्डौं । छिमेकी राष्ट्र भारतले नेपाली सेनालाई आज (आईतबार) १० वटा आईसियू भेन्टिलेटर सहयोग दिएको छ ।

कोभिड–१९ को महामारीविरुद्घ लड्न भारतीय सेनाले नेपाली सेनालाई १० वटा ‘आइसियु भेन्टिलेटर’ उपहार स्वरुप प्रदान गरेको हो ।

नेपालका लागि भारतका राजदूत विनय मोहन क्वात्राले ती भेन्टिलेटर प्रधानसेनापति पूर्णचन्द्र थापालाई जङ्गी अड्डामा आज आयोजित कार्यक्रममा प्रदान गरेका हुन् ।

मानवीय सहायता तथा राहतका लागि लामो समयदेखि भारतीय सेनाले नेपाली सेनालाई सहयोग गर्दै आएको छ । दुई देशका सेनाबीच रहिआएको निरन्तर मानवीय सहयोगअन्तर्गत भेन्टिलेटरहरू उपहारस्वरुप प्रदान गरिएको भारतीय राजदूतावासले जनाएको छ ।

हस्तान्तरणका क्रममा राजदूत क्वात्राले कोभिड–१९ विरुद्घको लडाइँमा विजय प्राप्तिका लागि नेपालका जनतालाई सबै आवश्यक सहयोग पुरयाउन भारत प्रतिबद्ध रहेको बताए ।