सिरहामा उत्तरायणी बोलबम सहित कतै पनि नाचगान हुँदैन : सिडिओ कणेल

न्यूज ब्यूरो, सिरहा । सिरहाका प्रमुख जिल्ला अधिकारी (सिडिओ) प्रदीपराज कणेलले प्रत्येक वर्ष लाग्दै आएको उतरायणी बोलबम यसपाली नलगाउन आग्रह गरेका छन् ।

जिल्ला प्रशासन कार्यालय सिरहाले बुधबार (आज) एक पत्र जारी गर्दै कोरोना महामारीको बदलिदो रुपलाई मध्यनजर गर्दै बोलबमको रुपमा लागिदै आएको उत्तरायणी मेला सहित जिल्लामा कुनै प्रकारको नाचगान नगराउन निर्देशन दिएको बताएका छन् ।

सिरहा जिल्लामा रहेको १७ वटै स्थानीय तहलाई लेखेको पत्रमा कोरोना भाइरस समुदाय स्तरमा फैलिँदै गएको भन्दै उत्तरायणी लगायतका नदी किनारमा बोलबम, जमघट, भीडभाड नगराउन निर्देशन दिएको सिडिओ कनेलले बताए ।

यसका साथै, जिल्ला भरि रहेको मन्दिर, मस्जिद, चर्च , गुम्बा सहित नदी किनारमा भिडभाड र कुनै पनि ठाँउमा कुनै प्रकारको नाचगान नगराउन निर्देशन पत्र मार्फत १७ वटै स्थानीय तहलाई दिएको हो ।

जिल्लामा भिडभाड हुने गरी हाट बजार नलगाउने, किनमेल गर्दा समाजिक दुरी कायम गर्ने, साबुन पानीले हात धुन लगाउने, सेनिटाइजर प्रयोग गर्न लगाउने जस्ता प्रावधान बनाउँदै जिल्ला भरिमा सँचालन हुने सवारी साधानको पनि अनुमगन गर्न निर्देशन दिएको हो ।

सँचालन हुने सवारी साधान कोरोना महामारीमा आवश्यक प्रोटोकल पुरा गरेको वा नगरेको बारे अनुगमन गरी प्रत्येक दिन जिल्ला प्रशासन कार्यालय सिरहामा रिर्पोट बुझाउन पत्राचार गरिएको हो ।