चिनियाँ राजदूत यु होङ जनकपुरमा

जनकपुरधाम, १७ माघ || नेपालका लागि चिनियाँ राजदूत यु होङ दुई दिने भ्रमणका लागि बुधबार जनकपुर आएकी छिन् ।

नेपालको इतिहासमा भारतसँग सीमा जोडिएको जनकपुरको भ्रमणमा आउने होङ पहिलो नेपालका लागि चिनियाँ राजदूत हुन् ।

यूएनडीपीको परियोजना अन्तर्गत तराई मधेसमा आएको बाढीले गर्दा पीडित भएका परिवारहरुलाई बाढीपछिको राहत कार्यक्रमका लागि राजदूत होङ जनकपुर आएकी हुन् ।

तराई मधेसको सुन्सरी, सप्तरी, महोत्तरी, सर्लाही, पर्सा, धनुषा र रौतहत गरी ७ वटा जिल्लाहरुमा कुल ४० हजार बाढीपीडितहरुलाई राहत वितरण गरिने कार्यक्रम रहेको छ ।

बुधबार बुद्ध ऐयरको उडानबाट जनकपुर आएकी राजदुत होङलाई यूएनडिपीको पदाधिकारीहरुले र जनकपुर उद्योग बाणिज्य संघका अध्यक्ष ललित कुमार साह र उपाध्यक्ष सुरेन्द्र भण्डारीले जनकपुर विमान स्थलमा स्वागत गरेका थिए ।

राजदुत होँगले धनुषाको धनुषाधाम नगरपालिकाका बाढी पीडितहरुलाई राहत समेत वितरण गरेकी छन् ।

निर्वाचन क्षेत्र नं. १ ख का प्रदेश सभा सदस्य रामचन्द्र मण्डलको अगुवाई तथा नगरपालिकाका मेयर बालेश्वर मण्डलको उपस्थितिमा धनुषाधाम वडा नंं ३ का बाढी पीडितहरुलाई राहत वितरण गरिएको जनाइएको छ ।

दुई दिन बसाईको क्रममा यी जिल्लाहरुका बाढी पीडितहरुलाई राहतको बाँडने कार्यक्रम तय गरिएको हो ।