राष्ट्र र जनताको लागि काम गर्दैगर्दा ई. गोईतको ज्यान गयो : मन्त्री मगर

न्यूज ब्यूरो, काठमान्डौं । खानेपानी मन्त्री बीना मगरले जनकपुरका ईन्जिनीयर सतिश गोईतले राष्ट्र र जनताको लागि काम गर्दै गर्दा ज्यानको आहुति दिएको बताएकी छन् ।

मेलम्ची खानेपानी आयोजनाको सुरुङको परीक्षण गर्ने क्रममा दुर्घटना भई ज्यान गुमाएका इञ्जिनियरको परिवारलाई उचित राहत र बीमा लगायतका सुविधाहरु दिने प्रक्रिया अघि बढाउन खानेपानी मन्त्रालयले पहल थालेको उनले बताइन् ।

ईन्जिनीयर सतीश कुमार गोइतको परिवारलाई उचित राहत र बीमा लगायतका सुविधाहरु दिने प्रक्रिया अघि बढाउन खानेपानी मन्त्रालयले पहल थालेको बताइएको छ ।

उक्त घटनाको सन्दर्भमा आइतबार ज्ञापन पत्र बुझाउन आएका प्रोगेसिभ इञ्जिनियरिङ एशोसियशन नेपाल प्रदेश नम्बर २ को प्रतिनिधि मण्डलसँगको भेटमा खानेपानी मन्त्री मगरले मेलम्ची आयोजनाको सुरुङ परीक्षणका क्रममा भएको उक्त घटनाले आफू निकै स्तब्ध भएको बताइन्।

मन्त्री मगरले सुरुङको परीक्षण गर्दा यस्तो घटना होला भनेर आफूले कल्पना समेत नगरेको बताइन्। ‘राष्ट्र र जनताको निम्ति काम गर्दा गर्दै इञ्जिनियर गोईतको ज्यान गयो। सवारी चालक मगर अझै बेपत्ता छन्।

अन्य दुई जना घाइतेहरुको उपचार भइरहेको छ।’ उनले भनिन्, ‘यो घटनाले हामीलाई निकै गम्भीर र दुःखी बनाएको छ। उनीहरुले गरेको योगदानप्रति हामीले सधैं सम्झन हाम्रो तर्फबाट केही न केही गर्नेछौं।’

खानेपानी मन्त्री मगरसँग भेट गर्दै एशोसियशनका तर्फबाट इञ्चार्ज इञ्जिनियर राम एकवाल यादव र अध्यक्ष सागरकुमार चौधरीले इञ्जिनियर गोईतको परिवारलाई उचित क्षतिपूर्ति उपलब्ध गराउन माग राखेका थिए।

खानेपानी मन्त्री बिना मगरको निर्देशनमा मेलम्ची खानेपानी आयोजना विकास समितिले उक्त दुर्घटनामा मृतक र बेपत्ता भएकाहरुलाई उचित राहत र बीमा लगायतका सुविधा दिने प्रक्रिया अघि बढाउन निर्माण व्यवसायी सिनो हाईड्रोलाई निर्देशन दिएको छ।

सुरक्षाका सबै उपायहरुको अबलम्बन गर्दा गर्दै हुन गएको दुर्घटनामा मानवीय क्षति भएकामा मेलम्ची समिति स्तब्ध भएको जनाएको छ।

राष्ट्रिय गौरवको मेलम्ची आयोजनाको सुरुङको परीक्षण गर्ने क्रममा गत असार ३० गते अचानक आयोजनाको मुहानस्थल हेलम्बु गाउँपालिका वडा १ अम्बाथानस्थित १७ नम्बर गेट खुल्दा ईन्जिनियर गोईत सहित अन्य चार जनालाई पानीले बगाएको थियो।

पानीको भेलले बगाएका कारण सवारी चालक राधाकृष्ण थापामगर अझै बेपत्ता हुनु भएको छ भने घटनामा घाईते भएका इञ्जिनियर शेखर खनाल र प्राविधिक पेमादोर्जे तामाङको उपचार भईरहेको छ। सशस्त्र प्रहरीको सहयोगमा सवारी चालक थापामगरको खोजी कार्य तीव्र पारिएता पनि हालसम्म कुनै सूचना प्राप्त हुन नसकेको आयोजनाले जानकारी दिएको छ।