'घरबाट निकालेर हात खुट्टा भाँच्छौं' : प्रचण्ड पक्षधर

न्यूज ब्यूरो, जनकपुरधाम । नेकपाका प्रचण्ड समर्थित युवा नेताहरुले पार्टी विपरित गए घरबाट निकालेर हातखुट्टा भाँच्ने चेतावनी दिएका छन् ।

पार्टी फुटको संघारमा पुगेको बेला नेकपा समर्थित युवा र विद्यार्थी संगठनले जनकपुर स्थित पार्टी कार्यालयमा धर्ना दिदै पार्टी एकताको सट्टा फुटाउने खेलमा लाग्ने जोकोहीलाई हात खुट्टा भाँच्ने चेतावनी दिएका छन।

पार्टी फुटाउन नहुने माग गर्दै राष्ट्रिय युवा संघ नेपाल र अखिल नेपाल राष्ट्रिय स्वतन्त्र विद्यार्थी युनियन धनुषाले शुक्रबार संयुक्त रुपमा पार्टी कार्यालय धनुषामा धर्ना दिएको हो ।

“फुटवादीहरु होसियार, एमसीसी खारेज गर, संसद अधिवेशन चालु गर” लगायतको नारा लेखिएको प्लेकार्ड सहित दुवै संगठनका नेता कार्यकर्ताले पार्टी कार्यालयमा धर्ना दिएका हुन् ।

उनीहरुले पार्टी फुटाउन कुनै किसिमको गतिविधि नगर्न र नगराउन धर्ना दिँदै जिल्ला पार्टी कार्यालय मार्फत केन्द्रिय पार्टी कार्यालयमा ज्ञापन पत्र बुझाएको हो ।

युवासंघका धनुषा जिल्ला संयोजक सरोज यादव र अखिल राष्ट्रिय स्वतन्त्र विद्यार्थी युनियन धनुषाका संयोजक आर.पी यादवले संयुक्त रुपमा हस्ताक्षर गरेको ज्ञापन पत्र पार्टी नेतृत्वलाई पठाइएर सावधान गराइएको जनाएको छ ।

प्रधानमन्त्री केपी शर्मा ओली सरकारको बचाउमा बुधबार जनकपुर लगायत देशको विभिन्न ठाउँमा उनका निकटले गरेको प्रदर्शनलाई युवा र विद्यार्थी संगठनले उच्छृँखल गतिविधिको सज्ञा समेत दिएका छन् ।

उच्सृंखल गतिविधिले पार्टी भित्र र आम जनतामा नकरात्मक असर परेकाले यस्ता गविधिहरु नगर्न नगराउन पनि माग गरेको छ ।