असई यादव ५००० घुस सहित पक्राउ

न्यूज ब्यूरो, जनकपुरधाम । सर्लाहीको ईश्वरपुर नगरपालिकाको गौरीशंकरबाट एक जना असई पाँच हजार घुस रकम सहित पक्राउ परेको छ ।

ईश्वरपुर नगरपालिका–१४, श्रीनगरस्थित प्रहरी चौकी गौरीशंरका इन्चार्ज एवम् प्रहरी सहायक निरीक्षक (असई) राम विश्वास राय यादव पाँच हजार रुपैयाँ घुस रकम सहित पक्राउ परेको हो ।

अख्तियार दुरुपयोग अनुसन्धान आयोगको बर्दिबास कार्यालयबाट खटिएको टोलीले असई यादवलाई गत मंगलबार असार २३ गते दिउँसो कार्यालयबाटै घुस लिएको रकमसहित रंगेहात पक्राउ गरेको हो ।

असई यादवले नियन्त्रणमा लिएको कागजात नभएको भारतीय नम्बर प्लेटको मोटरसाइकल छुटाइदिने प्रयोजनमा घुस लिएको अख्तियारले जनाएको छ ।

यादवलाई थप अनुसन्धानका लागि अख्तियारको बर्दिबास कार्यालय ल्याइएको छ ।