डाक्टर झामाथि आक्रमणको विरोधमा शहिदनगरका स्वास्थ्यकर्मीहरुको ऐक्यबद्धता

न्यूज ब्यूरो, जनकपुरधाम । गत असार ११ गते झापाको विर्तामोड स्थित रहेको मेडिका हस्पिटलमा कार्यरत डा. सुधारकर झा माथि भएको कुटपिट घटनाको दोषीलाई कारवाहीको माग गरिएको छ ।

धनुषाको शहिदनगर नगरपालिका अन्तर्गत कार्यरत स्वास्थ्यकर्मीहरुले सो घटनाको भत्र्सना गर्दै दोषी उपर कारवाहीको माग गरेको छ ।

उनीहरुले नेपाल सरकारको गृह मन्त्रालयको जेठ ४ गते जारी गरिएको विज्ञप्ति अनुसार नै दोषीलाई कारवाहीको माग गरेका छन् । डा. उदित मिश्राको अगुवाईमा स्वास्थ्यकर्मी सँजीत प्रसाद यादव, तुलाकृष्ण गोईत, फुलगेन ठाकुर, कपिलदेव अधिकारी, राम सिकिल यादव सहितले हातमा ब्यानर तथा प्लेकार्ड लिएर विरोध जनाएका छन् ।

कोरोना भाइरसको महामारीका बीच आफ्नो ज्यान जोखिममा राखेर फन्टलाइनमा काम गर्ने डाक्टरमाथिको हमला अमानवीय भएको भन्दै आफूहरु आन्दोलनमा उत्रिएको उनिहरुले बताएका छन्।

यस्तो बेला साथ, सहयोग र हौसला दिनुपर्नेमा उल्टै डाक्टरमाथि आक्रमण हुनु दुखद भएको भन्दै उनीहरुले सरकारसँग भरपर्दो सुरक्षाको माग समेत गरेका छन्। घटनाको सत्यतथ्य छानबिन गरी दोषीमाथि कडा कारबाही गर्न पनि चिकित्सकहरुले सम्बन्धित निकायसँग आग्रह गरेका छन्।

असार ११ गते राति करिब ९ः३० बजे हुल बाँधेर हस्पिटल पुगेको १०/१५ जनाको समूहले डाक्टर झामाथि आक्रमण गर्दा उनको नाकमा चोट लागेको थियो।

बिर्तामोड– ६ का ८ वर्षे बालक विज्ञान राईको हात भाँचिएपछि उपचारका लागि राति ८ बजे हस्पिटल लगिएको थियो।

हस्पिटलका अनुसार बालकको हातको अप्रेसन गरिएको र अवस्था सामान्य थियो। उनीहरूले बिरामी हेर्न एकै पटक जान खोजेपछि नजिकै रहेका डाक्टर झाले सम्झाउन खोज्दा उनीमाथि आक्रमण भएको जनाइएको छ।