राजू सदाको न्याय आन्दोलनमा हाम्रो पनि ऐक्यबद्धता छ : मेयर मण्डल

न्यूज ब्यूरो, जनकपुरधाम । उपचारको अभावमा छटपटाएर मृत्यू भएका धनुषाका राजु सदाको भोली (विहिबार) जनकपुर प्रादेशिक अस्पताल घेराउ गर्ने भएको छ ।

धनुषाको हँसपुर नगरपालिकाका मेयर राम ज्ञान मण्डलले आफ्नो नगरकै एक किशोरलाई अस्पतालले उपचार नगर्दा मृत्यू भएको भन्दै न्यायको लागि प्रादेशिक अस्पताल र सिडिओ अफिस पनि घेराउ गर्ने सदा समुदायको आन्दोलनमा ऐक्यबद्धता जनाउने बताएका छन् ।

आज (बुधबार) राजु सदाको घरमा राहत लिएर पुगेको मेयर मण्डलले राजुको परिवारसँग न्यायको लागि आफूलाई जे गर्नुपर्ने सबे गर्न तयार रहेको प्रतिक्रिया दिएका छन् ।

उनले जनकपुर प्रादेशिक अस्पतालमा राजु छटपटाई रहँदा पनि अस्पताल प्रशासनको लापरवाही र चिकित्सकको लापरवाहीका कारण उनले प्राण त्यागेको बताउँदै यस घटनाका सबै दोषीलाई कारवाहीको कठघारामा ल्याउन सदा समुदायको आन्दोलनमा ऐक्यबद्धता जनाउने बताएका छन् ।

सो क्रममा मेयर मण्डल र नगरकी उपमेयर रेणु देवी झाले सँयुक्त रुपमा राजु सदाको परिवारलाई तत्काल राहत स्वरुप २ क्वीन्टल चामल, ५६ किलो आलु, २० किलो दाल, १५ किलो खाने तेल र ५ किलो नुन उपलब्ध गराएका छन् ।

यसका साथै, राजूको क्रिया खर्च सहित उनकी आमाको लागि दुई जोडी साडी, उनको बुवाको लागि सर्ट पैन्ट, उनका बहिनीहरुको लागि पनि कपडा प्रदान गरेका छन् ।

सो क्रममा नेपालको तर्फबाट सउदी अरेबियाका राजदुत एवम् हँसपुर नगरपालिकाकै कठपुल्ला बस्ने महेन्द्र सिँह राजपुतले ५० हजार रुपैयाँ सहयोग गरेका छन् ।

मृतक राजु सदाको परिवारको अवस्थालाई मध्यनजर गर्दै राजदुत सिँहले राहत स्वरुप व्यक्तिगत तर्फबाट ५० हजार रुपैयाँ सहयोग गरेका हुन । उनले सँचारकर्मी राजन सिँह मार्फत सो रकम पठाएका हुन् ।