दाईजो र पञ्चायती समाजबाट मुक्त हुन श्यामलाल मृत्यू रोजे !

न्यूज ब्यूरो, सिरहा । सिरहामा एक व्यक्तिले दाईजोको चाप र गाउँको पञ्चायतको चापले मृत्यू रोजेका छन् ।

सिरहाको लहान नगरपालिका वडा नं. २४ बस्ने स्थानीय श्याम लाल रामले दाईजो र समाजको चापले आत्महत्या गरेका छन् ।

राम आज (विहिबार) विहान घरदेखि केही पर आँपको बगैचामा झुण्डिएको फेला परेको हो । उनी डोरीमा पासो लगाएर झुण्डिएको अवस्थामा स्थानीयहरुले देखेपछि प्रहरीलाई खवर गरेको थियो ।

रामको जेठी छोरीको विहेबारी केहीदिन अघि मिलाइएको थियो । तर, उनकी छोरी गाउँकै अर्कै जनासँग विहेअघि भागेपछि (प्रेम विवाह) राम परिवार तनावमा थिए ।

रामले जेठी छोरीको विवाह २ लाख रुपैयाँ नगद सहित मोटरसाईकल समेत दाईजोमा दिने कुरा मिलाएका थिए । तर, छोरी भागेपछि उनकी माझिला (महिला) छोरीसँग विवाह गर्न केटा पक्ष र श्यामलाल पक्ष सहमत भएको थियो ।

केटापक्षले तुरुन्तै मोटरसाईल दिए मात्र विहेको लागि मान्ने कुरा भएको थियो । यसअघि श्यामलालले केटापक्षलाई पहिले नै २ लाख रुपैयाँ सहित अन्य समानहरु पनि दिसकेको थियो ।

तर केटापक्षले श्यामलाल सँग लिएको २ लाख रुपैयाँ र समानहरु कुनै पनि हालातमा फिर्ता दिने पक्षमा थिएनन, त्यही भएर दोस्रो छोरीसँग विहेको कुरा पक्का भएको थियो ।

स्थानीय समाजले उनकी छोरी भागेपछि उनलाई उल्टै जरिवाना लगाएको थियो । श्यामलाल जरिवाना पनि तिर्न तयार भएको थियो । तर केही व्यक्तिहरुले पञ्चायत पनि नमानेर अवज्ञा गरेको थियो ।

श्यामलाल उपर छोरीको विहे तय भएपछि भागेको पीडा, पञ्चातय र समाजको बोझ, दाईजाको बोझ र मोटरसाईकल दिने तनाव सहन नसकेर अन्त्यमा मृत्यू रोज्न पुगेको स्थानीयहरुले बताएका छन् ।

श्यामलाल मरेपछि उनको बुवाको अवस्था चिन्ताजनक भएको छ । उनका छोराछोरी अभिभावक विहिन बनेको छ ।