पिपराको बजेट ४७ करोड बढी, गाउँपालिकामै आयूर्वेद अस्पताल सँचालन हुने

न्यूज ब्यूरो, जनकपुरधाम । महोत्तरीको पिपरा गाउँपालिकाले आगामी आर्थिक वर्षमा गाउँपालिकामै आयूर्वेद अस्पताल सँचालनको अवधारणा ल्याएको छ ।

बुधबार सम्पन्न भएको छैठौं गाउँसभाबाट आर्थिक वर्ष २०७७÷०७८का लागि ४७ करोड २१ लाख ५८ हजार ६ सय रुपैयाँको बजेट विनियोजन गरिएको हो ।

गाउँपालिकाका अध्यक्ष विक्रम चौधरीले बजेट प्रस्तुत गर्दै आम्दानी तर्फ आन्तरिक राजश्व तर्फ ३ करोड, राजश्व बाँडफाँड अन्तर्गत संघिय सरकारबाट प्राप्त ७ करोड ३५ लाख ४६ हजार ६ सय, प्रदेश सरकारबाट प्राप्त ४१ लाख ५९ हजार गरी कुल १० करोड ७७ लाख ५ हजार ६ सय , संघिय सरकारबाट प्राप्त समानीकरण अनुदान तर्फ ११ करोड ८४ लाख, सशर्त अनुदान १७ करोड ५७ लाख, प्रदेश सरकारबाट समानीकरण अनुदान ७३ लाख ५३ हजार, सशर्त अनुदान ८० लाख, समपुरक अनुदान २० लाख, विशेष अनुदान ३० लाख रहेको बताए ।

चालु आर्थिक वर्ष २०७६÷०७७ को बैंक मौज्दात ५ करोड रहेको छ । गाउँसभाले पारित गरेको बजेटमा चालु आर्थिक वर्षको कोरोना महामारी तथा विभिन्न कारणवश पुरा हुन नसकेको तथा निति तथा कार्यक्रममा उल्लेख रहेका कार्यक्रमहरुलाई आउने आर्थिक वर्षमा नियमित गरिने बताइएको छ ।

आगामी नीति तथा कार्यक्रममा कोरोनाका कारण प्रभावित भएकाहरुलाई पुनस्थापित गर्न तथा पढाई छुटाएकाहरुका लागि भर्चुअल क्लास संचालनमा ल्याउने, गाउँपालिकामा रहेको ऐतिहासिक तथा सांस्कृतिक धरोहरहरुको संरक्षण तथा सम्बद्र्धन, स्थानीय भाषा तथा संस्कृतिको विकास, सडक विस्तार, धुवाँरहित गाउँपालिका बनाउन प्रेरित गरिने, गाउँपालिकामै आयुर्वेद अस्सपताल संचालनमा ल्याउने, आर्गेनिका खेतीमा जोड दिइने, पिपरा ३ मा रहेको प्राथमिक स्वास्थ्य केन्द्रलाई सुविधा सम्पन्न अस्पतालको रुपमा विकास गर्ने, कोरोनाका कारण उत्पन्न जोखिम न्युनीकरण गर्ने लगायतका कार्यक्रमहरुलाई प्राथमिकीकरण गरिएको प्रमुख प्रशासकीय अधिकृत राम किशोर महतोले बताए ।

अधिकृत महतोका अनुसार गाउँपालिकालाई आधारभूत सिटिको अवधारणा सहित गाउँपालिकाभित्रै आयूर्वेद अस्पताल राष्ट्रगौरवको योजना हुनेछ ।

बजेटबाट प्रत्येक वडालाई भने १ करोड ४० लाख रुपैयाँ सेलिँग गरिएको अधिकृत महतोले थपे ।