मिर्चैया : पोखरीमा विष हालिदिँदा ५ लाखबढीको माछा मरे

न्यूज ब्यूरो, सिरहा । सिरहाको मिर्चैया नगरपालिका–१२ सिक्रौनस्थित माछा पालिएको एक पोखरीमा विष हालिदिँदा करिब पाँच लाख मूल्य बराबरको माछा मरेको छ ।

पोखरीमा गएराति करिब १२ बजेको समयमा अज्ञात समूहले विष राखिदिएपछि विभिन्न प्रजातिका तयारी अवस्थामा रहेका तथा हालै राखिएका सबै माछा नष्ट भएको छ ।

डाहा वा व्यक्तिगत रिसइवीका कारण कसैले पोखरीमा विष हलेको हुन सक्ने आशंका गरिएको छ । स्थानीय अरविन्द सहनीसहित ३ जनाले पोखरी ठेक्का लिएर माछा पालन सञ्चालन गरेका थिए ।

ठूलो लगानी र मेहनतमा यस्तो भइदिँदा स्तब्ध तुल्याएको व्यवसायी सहनीले पीडा पोखे । विद्यार्थी जनमत संघका सिरहाका अध्यक्षसमेत रहेका सहनीले स्वदेशमै कर्म र मेहनत गर्न चाहनेलाई मनोवल गिराउन खोज्नु गैर सामाजिक कार्य भएको बताए ।

पोखरीमा विष हालिदिएको जानकारी पाएपछि प्रहरी घटनास्थल पुगेको छ । यसमाथि अनुसन्धान तथा खोजविन गरिरहेको मिर्चैया प्रहरीले जनाएको छ ।