बाँकेमा हाइस दुर्घटना हुँदा ११ जनाको घटनास्थलमै मृत्यु

न्यूज ब्यूरो, काठमाडौं । बाँकेमा आइतबार मध्यराति गाडी दुर्घटना हुँदा ११ जनाको ज्यान गएको छ ।

दुर्घटनामा परी २२ जना घाइते भएका छन् । पूर्वपश्चिम राजमार्गअन्तर्गत् बाँकेको राप्तीसोनारी २ स्थित ठुरिया जंगलमा राति १२ बजेतिर हाइस गाडी दुर्घटनामा परेको हो ।

बाँके जिल्ला प्रहरी कार्यालयका अनुसार नेपालगन्जबाट सल्यान जाँदै गरेको ना ५ ख ५९९५ नम्बरको हाइस गाडी रोकिराखेको बा ४ ख ९०६४ नम्बरको ट्रकमा ठोक्किएको हो। । दुर्घटनामा ११ जनाको घटनास्थलमै मृत्यु भएको छ भने २२ जना घाइते भएको प्रहरीले जनाएको छ ।

घाइतेहरुलाई भेरी अस्पताल लगिएको छ । शव पनि त्यही अस्पतालको शव गृहमा राखिएको छ । मृतकको सनाखत हुन बाँकी रहेको प्रहरीले जनाएको छ ।

दुर्घटनामा परेको हाइसमा भारतका विभिन्न सहरबाट फर्किएका ३३ जना सवार थिए । उनीहरुलाई नेपालगन्ज नाकाबाट उद्धार गरेर घर पठाइँदै गर्दा गाडी दुर्घटनामा परेको प्रहरीले बताएको छ ।