लकडाउनको विरोधमा तरुण दलले जनकपुर तताए !

न्यूज ब्यूरो, जनकपुरधाम । लकडाउन जारी रहेको बेला जनकपुरका युवाहरु सडक तताएका छन् ।

आज (आईतबार) साँझ नेपाल तरुण दल धनुषाका पदाधिकारीहरु सहित नेपाली काँग्रेस समर्थित युवाहरुले जनकपुर तताएका हुन ।

उनीहरुले वर्तमान सरकार कोरोना भाइरससँग लडन नसकेको तथा व्यवस्थापन तर्फ फेल भएको भन्दै सरकारको विरोध गरेका हुन् । उनीहरु मशाल बालेर विरोध जनाएका छन् ।

जनकपुरधाम उपमहानगरपालिका वडा नं. २ को जनकचोकमा तरुण दलका पदाधिकारीहरुले टायर बालेर प्रदर्शन गरेका छन् । उनीहरु जनकचोक हुँदै भानुचोकमा गएर कोण सभामा परिणत गरेको थियो ।

भानुचोक पुग्नु अघि भानुचोक र शिवचोकको बीच प्रहरीले उनीहरु उपर हस्तक्षेप गरेको थियो । प्रहरीले समान्य लाठी चार्ज समेत गरेको थियो ।

तरुण दल धनुषाका उपाध्यक्ष राकेश विक्रम साहको अगुवाईमा निकालिएको मशाल जुलुसको क्रममा कोरोनाको नाममा मान्छे मार्न पाउँदैन, वर्तमान सरकार मूर्दावाद जस्ता नाराहरु घन्काएका थिए ।

लकडाउनमा प्रदर्शन गरेको तथा समाजिक दुरी कायम नगरेको भन्दै प्रहरीले समान्य लाठीचार्ज समेत गरेको थियो । सो क्रममा तरुण दल धनुषाका उपाध्यक्ष साह सहित नेपाल विद्यार्थी सँघ महोत्तरीका अध्यक्ष आसुतोष झा, रमेश कुमार यादव, विजय यादव लगायतका युवालाई समान्य चोट लागेको बताइएको छ ।

उनीहरुले तीनै तहका सरकार मिलेर पनि क्वारेन्टाइन, आईसोलेशन, पिसिआर चेकअप समेत व्यवस्थापन गर्न नसकेको भन्दै विरोध जनाएका छन् । लकडाउनको बहानामा नागरिकको हत्या गर्न खोजेको जिकीर उनीहरुले गरेका थिए ।

उनीहरुले लकडाउनको समेत विरोध जनाएका थिए ।